އެޖެންޑާގައި ގިނަ މައްސަލަތަކެއް ހިމަނާފަ އޮތް، ރައްޔިތުންގެ މަޖިލިހުގެ މިއަދުގެ ޖަލްސާ ކޯރަމް ހަމަނުވެގެގެން ކެންސަލް ކޮށްފިއެވެ.
ރައްޔިތުންގެ މަޖިލިހުގެ ގަވާދިއުގައިވާ ގޮތުން މަޖިލިހުގެ ޖަލްސާގެ ކޯރަމްއަކީ 22 މެމްބަރުންނެވެ. މިއަދު ޖަލްސާގެ ފެށުމާއެކު ރިޔާސަތުގައި އިންނެވި، މަޖިލިސް ނާއިބު ރައީސް އީވާ ވަނީ ޖަލްސާ ނިންމާލިކަން އިއުލާން ކުރައްވާފައެވެ.
މިއަދުގެ ޖަލްސާއަކީ މިހާތަނަށް ނިމިފައިނުވާ ގިނަ މައްސަލަތަކެއް އެޖެންޑާ ކޮށްފައި އޮތް ޖަލްސާއެކެވެ. އޭގެ ތެރޭގައި ދެ ސަފީރަކަށް ރުހުން ދިނުމާއި ފަނޑިޔާރަކު މަގާމުން ވަކިކުރަން ޖޭއެސްސީން ފޮނުވާފައިވާ މައްސަލައެއްގެ އިތުރުން ދިގުލައިގެން ގޮސްފައިވާ އިންޑަސްޓްރިއަލް ރިލޭޝަންސްގެ ބިލާއި ޖޭއެސްސީ އެކުލަވާލާފައިވާ ގޮތް ބަދަލުކުރުމުގެ ބިލުގެ އިތުރުން ނުނިމި އޮތް ހަތަރު ގަރާރެއްގެ ބަހުސް ހިމެނެ އެވެ.
ފަހަކަށް އައިސް ރައްޔިތުންގެ މަޖިލިހުގެ ގިނަ ޖަލްސާތަކެއް ކޯރަމް ހަމަނުގެން ކެންސަލްކުރަން ޖެހިފައިވާއިރު، ކޯރަމް ހަމަނުވެދިޔަ ބައެއް ޖަލްސާތައް ކޯރަމް ހަމަކުރުމަށް އިތުރަށް ވަގުތު ދީގެން ފަށާފައި ވެއެވެ.
ރައްޔިތުންގެ މަޖިލިހުގެ މިއަދުގެ ޖަލްސާ ކޯރަމް ހަމަނުވެގެން ކެންސަލް ކޮށްފައިވާއިރު، އެމްޑީޕީގެ ޕާލަމެންޓްރީ ގުރޫޕުން ވަނީ ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައެވެ.
ރައްޔިތުންގެ މަޖިލިހުގެ ރައީސްގެ އިތުބާރު ނެތްކަމަށް ނިންމުމަށް 45 މެމްބަރުން ސޮއި ބޭނުންވާއިރު، އެމްޑީޕީގެ ޕާލަމެންޓްރީ ގުރޫޕު ޕާލަމްނެޓްރީ ގުރޫޕުގެ 55 މެމްބަރުންގެ ތެރެއިން 48 މެމްބަރުން ނަޝީދުގެ ނޯ ކޮންފިޑެންސް މޯޝަންގައި ސޮއިކޮށްފައިވާކަން ވަނީ އެނގިފައެވެ.
މިއީ ނަޝީދުގެ އިތުބާރު ނެތް ކަމުގެ މައްސަލަ މަޖިލިހަށް ހުށަހެޅި ދެވަނަ ފަހަރެވެ.
މަޖިލީހުގެ ރައީސް އާއި ނައިބު ރައީސްގެ އިތުބާރު ނެތްކަމަށް އެންމެ ފުރަތަމަ އެމްޑީޕީގެ ޕީޖީ ގްރޫޕުން ހުށަހެޅީ 54 މެމްބަރުންގެ ސޮޔާއިއެކުގައެވެ. ނަމަވެސް ރިޔާސީ އިންތިޚާބުގެ ފުރަތަމަ ބުރުގައި ރައީސް ސޯލިހަށް ލިބިވަޑައިގެންނެވި ދަށް ނަތީޖާއާއެކު، އެމްޑީޕީން ޑިމޮކްރެޓްސްއާއި އެކު ގުޅިގެން މަސައްކަތްކުރުމުގެ ބޭނުމުގައި އެ މައްސަލަތައް އަނބުރާ ނެގިއެވެ. އެ މައްސަލަތައް އަނބުރާ ނެގިނަމަވެސް ޑިމޮކްރެޓްސް އިން އެމްޑީޕީއަށް ތާޢިދުކޮށްފައެއް ނުވެއެވެ.
ރިޔާސީ އިންތިޚާބުގެ ދެވަނަ ބުރުންވެސް އެމްޑީޕީއަށް ލިބުނު ނާކާމިޔާބީއާއެކު އެޕާޓިން ބޭއްވި ޤައުމީ މަޖިލީހުގެ ޖަލްސާގައިވެސް އެމްޑީޕީގެ ބައެއް މެންބަރުން ވަނީ އަލުން ނަޝިދުގެ އިތުބާރު ނެތްކަމުގެ މައްސަލަ ހުށައެޅުމަށް އެދިވަޑައިގެންފައެވެ.
އެމްޑީޕީގެ ބައެއް މެންބަރުން ވިދާޅުވީ، ރައީސް ނަޝިދުގެ އިތުބާރު ނެތްކަމުގެ މައްސަލަ ހުށައެޅުމުގެ ބޭނުމަކީ، މަޖިލީހުގެ އަޣްލަބިއްޔަތު އެމްޑީޕީއަށްއޮވެ، މަޖިލީހުގެ ރައީސަކަށް ހުންނަވަންޖެހޭނީ އެޕާޓިގެ ބޭފުޅެއްކަމަށްވާތީކަމަށެވެ. އެ މަޤާމަކީ އެޕާޓީއަށް މުހިންމު މަޤާމެއްކަމަށްވެސް އެމްޑީޕީގެ ބައެއް މެންބަރުން ވިދާޅުވިއެވެ.
މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ ސޮޔާއިއެކުއެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ. އެމްޑީޕީގެ 55 މެންބަރުން މަޖިލީހުގައި ތިއްބަވައެވެ.
