މިދައުރަކީ ވައްކަމާއި ދެކޮޅަށް ވާހާކަ ދެއްކުމުގެ ފުރުޞަތު އެންމެ ބޮޑަށް ލިބުނު ފަސް އަހަރުކަމަށް ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަޠީފް ވިދާޅުވެއްޖެއެވެ.

ޔާސިރު "އެކްސް"ގައި ކުރެއްވި ޕޯސްޓެއްގައި ވިދާޅުވީ، ވައްކަން ބަލަންޖެހޭނެކަމަށާއި، މިދައުރު ވިޔަސް، ނިމިދިޔަ ދައުރު ވިޔަސް، އަދި އޭގެ ކުރީ ދައުރަށް ވީނަމަވެސް ރައްޔިތުންގެ ފައިސާއަށް ހިޔާނާތްތެރި ވެފައިވާނަމަ އެކަންކަން ބެލި އަދަބު ލިބެން ޖެހޭނެކަމަށް ޔާސިރު ވިދާޅުވިއެވެ. ފެންނަން އޮތް ހަގީގަތަކީ މިދައުރަކީ ވައްކަމާއި ދެކޮޅަށް ވާހާކަ ދެއްކުމުގެ، ވައްކަންތައް ހާމަކުރުމަށް ސަރުކާރު ނިސްބަތްވާ ޕާޓީގެ މެންބަރުންނަށް ވެސް، އާންމުން ރައްޔިތުނަށްވެސް، ނޫސްވެރިންނަށް ވެސް އެންމެ ބޮޑަށް ފުރުސަތު ލިބިގެންދިޔަ ފަސް އަހަރުކަންކަމަށްވެސް ޔާސިރު ވިދާޅުވިއެވެ.

ވައްކަމާއި ދެކޮޅުވާން ޖެހޭނީ ދައުލަތުގެ މަގާމުގައި ނުހުންނަ އިރު އެކަންޏެއް ނޫން، ބަލަން ޖެހޭނީ ވަކި މީހަކު، ވަކި ދައުރެއްގައި ކުރާ ވައްކަމެއްވެސް ނޫން. ދޮނެއް، ކަޅެއް، ދިގެއް، ކުރެއް، އިއްޔެއެއް، މިއަދެއް، މާދަމާއެއް ނެތް، އަބަދުވެސް ވައްކަމާއި ދެކޮޅު.

– ޔާސިރު ޢަބްދުއްލަޠީފް ވިދާޅުވިއެވެ.

ޔާސިރަކީ އެމްޑީޕީގެ މެންބަރެއްގެ ގޮތުގައި މަޖިލީހަށް އިންތިޚާބުވެވަޑައިގެންނެވި މެންބަރެކެވެ. ނަމަވެސް އެމްޑީޕީގެ ތެރޭގައި ރިޔާސީ ޕްރައިމަރީއަށްފަހު އުފެދުނު ޚިޔާލުތަފާތުވުންތަކާއެކު އެމްޑީޕީ ދޫކުރައްވާ ރައީސް ނަޝީދުގެ ދަ ޑިމޮކްރެޓްސްއާއި ގުޅިވަޑައިގަތެވެ. ނަމަވެސް ރިޔާސީ އިންތިޚާބު ބޯމަތިވެފައިވަނިކޮށް، އަނެއްކާވެސް ޑިމޮކްރެޓްސް ދޫކުރައްވާ އެމްޑީޕީއާ ގުޅިވަޑައިގަތެވެ.

ދަ ޑިމޮކްރެޓްސްގައި ހުންނެވިއިރު، ޔާސިރު ވަނީ މިސަރުކާރުގެ ކޮރަޕްޝަނާއި ގުޅޭގޮތުން ވާހަކަފުލު ދައްކަވާ އެކަމަށް މިސަރުކާރަށް ވަރަށް ބޮޑަށް ފާޑުވިދާޅުވެފައެވެ. ނަމަވެސް އަލުން އެމްޑީޕީއާ ގުޅިވަޑައިގަތުމަށްފަހު ގެންދަނީ ސަރުކާރަށް ތާޢިދުކުރައްވާ ވާހަކަފުޅު ދައްކަވަމުންނެވެ.