ރައްޔިތުންގެ މަޖިލީހުގެ ރިޔާސަތުގައި އިންނަވަންޖެހޭނީ އެމްޑީޕީގެ މެންބަރެއް ކަމަށާއި، މިފަހަރު ބަހަނާއަށް ދީއްލާލުމެއް ނެތްކަމަށް ދުވާފަރު ދާއިރާގެ އެމްޑީޕީ މެންބަރު އިސްމާޢީލް އަޙްމަދު ވިދާޅުވެއްޖެއެވެ. އޭނާ މިހެން ވިދާލުވީ ރައީސް ނަޝީދުގެ އިތުބާރު ނެތްކަމުގެ މައްސަލަ އަނެއްކާވެސް އެމްޑީޕީން ހުށައެޅުމަށް ތައްޔާރުވެފައިވަނިކޮށެވެ.

މީގެ ކުރިންވެސް ރައީސް ނަޝިދުގެ އިތުބާރު ނެތްކަމުގެ މައްސަލަ ހުށައެޅިނަމަވެސް، ރިޔާސީ އިންތިޚާބުގެ ދެވަނަ ބުރަށް ދަ ޑިމޮކްރެޓްސްގެ ތާޢީދު ހޯދުމުގެ ގޮތުން އެމްޑީޕީން އެ މައްސަލަ އަނބުރާ ނެގީއެވެ. ނަމަވެސް އެމްޑީޕީގެ ކެންޑިޑޭޓް އަދި ރައީސް އިބްރާހީމް މުޙައްމަދު ޞާލިޙަށް އިންތިޚާބު ނާކާމިޔާބުވުމާއި ގުޅިގެން، އަނެއްކާވެސް ރައީސް ނަޝީދުގެ އިތުބާރު ނެތްކަމުިގެ މައްސަލަ ހުށައެޅުމަށް ނިންމީއެވެ.

ރައީސް ނަޝީދުގެ އިތުބާރު ނެތްކަމުގެ މައްސަލައާއި ގުޅިގެން މެންބަރު އިސްމާޢީލް ވިދާޅިވީ މިފަހަރު އެ މައްސަލަ ދޫކޮށްލުމުގެ ވިސްނުން ނުގެންގުޅޭކަމަށެވެ.

ކުޑަނަމަވެސް ހިޔާނާތެއް ވެފައިވާނަމަ އެކަމެއް ބެލުމަށް ބޮޑުކޮށް ތާއީދު! އަވަސް ކުރައްވާ! އެކަމަކު އެމްޑީޕީ މެޖޯރިޓީ މަޖިލީސްގެ ރިޔާސަތުގައި އިންނަވަންވާނީ އެމްޑީޕީ މެމްބަރެއް! މިކަން އަވަހަށް ތަރުތީބުކޮށްދެއްވުމަށް ލީޑަރސިޕަށް ގޮވާލަން! އެކި ބަހަނާއަށް ދީއްލަލުމެއް ނެތް!

– އިސްމާޢީލް އަޙްމަދު ވިދާޅުވިއެވެ.

މަޖިލީހުގެ ރައީސްއާއި ނައިބު ރައީސްގެ އިތުބާރު ނެތްކަމަށް އެމްޑީޕީގެ ޕީޖީ ގްރޫޕުން ކުރިން ހުށަހެޅީ 54 މެމްބަރުންގެ ސޮޔާއިއެކުގައެވެ. ނަމަވެސް ރިޔާސީ އިންތިޚާބުގެ ފުރަތަމަ ބުރުގައި ރައީސް ޞާލިޙަށް ލިބިވަޑައިގެންނެވި ދަށް ނަތީޖާއާއެކު، އެމްޑީޕީން ޑިމޮކްރެޓްސްއާއި އެކު ގުޅިގެން މަސައްކަތްކުރުމުގެ ބޭނުމުގައި އެ މައްސަލަތައް އަނބުރާ ނެގިއެވެ. އެ މައްސަލަތައް އަނބުރާ ނެގިނަމަވެސް ޑިމޮކްރެޓްސްއިން އެމްޑީޕީއަށް ތާޢީދުކޮށްފައެއް ނުވެއެވެ.

ރިޔާސީ އިންތިޚާބުގެ ދެވަނަ ބުރުންވެސް އެމްޑީޕީއަށް ލިބުނު ނާކާމިޔާބީއާއެކު އެޕާޓީން ބޭއްވި ޤައުމީ މަޖިލީހުގެ ޖަލްސާގައިވެސް އެމްޑީޕީގެ ބައެއް މެންބަރުން ވަނީ އަލުން ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް އެދިވަޑައިގެންފައެވެ.

އެމްޑީޕީގެ ބައެއް މެންބަރުން ވިދާޅުވީ، ރައިސް ނަޝިދުގެ އިތުބާރު ނެތްކަމުގެ މައްސަލަ ހުށައެޅުމުގެ ބޭނުމަކީ، މަޖިލީހުގެ އަޣްލަބިއްޔަތު އެމްޑީޕީއަށްއޮވެ، މަޖިލީހުގެ ރައީސަކަށް ހުންނަވަންޖެހޭނީ އެޕާޓީގެ ބޭފުޅެއްކަމަށްވާތީކަމަށެވެ. އެ މަޤާމަކީ އެޕާޓީއަށް މުހިންމު މަޤާމެއްކަމަށްވެސް އެމްޑީޕީގެ ބައެއް މެންބަރުން ވިދާޅުވިއެވެ.

އެނގިފައިވާގޮތުގައި ރައީސް ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް ބޭނުންވާ ޢަދަދަށް ސޮއި ވަނީ ހަމަވެފައެވެ.

މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ ސޮޔާއިއެކުއެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ. އެމްޑީޕީގެ 55 މެންބަރުން މަޖިލީހުގައި ތިއްބަވައެވެ.