އިންތިޚާބީ ރައީސް ޑރ.މުޙައްމަދު މުޢިއްޒު ހުވާކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރު ނަރެންދުރަ މޯދީއަށް ދަޢުވަތު ދެއްވާނެކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އިންޑިއާގެ "ދަ ހިންދޫ" ނޫހަށް ރައީސް ނަޝިދު ދެއްވި އިންޓަރވިއުއެއްގައި ވިދާޅުވެފައިވަނީ، ޑރ.މުޙައްމަދު މުޢީއްޒުގެ ވެރިކަމުގައި ރާއްޖެއާއި އިންޑިއާގެ ގާތް ގުޅުން ހީނަރުވާނެކަމަށް ދެކެވޭ ވާހަކަތަކީ ހަގީގަތެއް ނޫންކަމަށެވެ. ރައިސް ނަޝިދު ވިދާޅުވީ ސަރުކާރު ބަދަލުވުމުގެ މަރުހަލާގެ ކަންކަން ކުރިއަށްގެންދަވާ ޓްރާންސްސިޝަނަލް ކޮމިޓީގެ މެންބަރުންނާއިވެސް އެވާހަކަ ހިއްސާކުރައްވާފައިވާނެކަމަށާއި، ޑރ.މުއިއްޒު ހުވާ ކުރައްވާ ރަސްމިއްޔާތަށް މޮދީއަށް ދަޢުވަތު ދެއްވާނެކަމަށެވެ.

ރައީސުލްޖުމްހޫރިއްޔާކަމަށް އިންތިޚާބުވެވަޑައިގަންވާ ބޭފުޅާއާއި، ނާއިބު ރައީސްކަމުގެ މަޤާމަށް އިންތިޚާބުވި ބޭފުޅާ ހުވާކުރެއްވުމުގެ އިންތިޒާމް ހަމަޖައްސަވާނީ ރައްޔިތުންގެ މަޖިލީހުންނެވެ. އެބޭފުޅުން ހުވާ ކުރައްވާނީ މަޖިލީހުގެ ޖަލްސާއެއްގައެވެ.

ރައީސް ނަޝިދު މިހެން ވިދާލުވެފައިވާއިރު ޑރ.މުޙައްމަދު މުޢީއްޒުގެ ފަރާތްޕުޅުން  މުޙައްމަދު ޙުސައިން ޝަރީފް (މުންދު) އިންޑިއާގެ މީޑިއާއަށް ދެއްވި އިންޓަރވިއުއެއްގައި ވިދާޅުވެފައިވަނީ ޑރ.މުއިއްޒު އެންމެ ފުރަތަމަ ޤައުމަކަށް ވަޑައިގަންނަވާނީވެސް އިންޑިއާއަށްކަމަށެވެ.

ރިޔާސީ އިންތިހާބު ޑރ. މުއިއްޒު ކާމިޔާބު ކުރެއްވުމާއި ގުޅިގެން މަރުހަބާ ވިދާޅުވެ، އެމަނިކުފާނު ޓެގް ކުރައްވާ މި ސަރުކާރާއި ގާތް ގުޅުމެއް ބާއްވަމުން އަންނަ އިންޑިއާގެ ބޮޑުވަޒީރު މޯދީ ކުރެއްވި އެކްސްއެއްގައި ވިދާޅުވީ، އިންޑިއާ އާއި ރައްޖެއާ ދެމެދު އޮތް ޒަމާންވީ ގުޅުން އިތުރަށް ބަދަހިކޮށް، އިންޑިއާ ކަނޑުގެ ސަރަހައްދުގައި ދެ ގައުމުގެ ގުޅުން އިތުުރަށް ބަދަހި ކުރެއްވުމަށް އަބަދުވެސް މަސައްކަތް ކުރައްވާނެ ކަަމަށެވެ.

އިންޑިއާގެ ނުފޫޒު ރާއްޖެއަށް ވަރަށް ބޮޑަށް އޮތް ކަމަށް މި ސަރުކާރު ފެށުނީއްސުރެ އިދިކޮޅު ފަރާތްތަކުން ދަނީ ބުނަމުންނެވެ. އަދި އެކަމުގެ ސަބަބުން ރާއްޖެއަށް އެތައް ނުރައްކާތަކެއް ކުރަމުންދާކަމަށް ބުނަމުންދާއިރު، އެންމެ ނުރައްކާ ބޮޑު ކަމެއްގެ ގޮތުގައި އިދިކޮޅުން ފާހަގަކުރަނީ ރާއްޖޭގައި އިންޑިއާ ސިފައިން ތިބުމެވެ. މިކަމާއި ދެކޮޅަށް ބޮޑު ކެމްްޕެއިނެއްވެސް ފެށިއެވެ. ޑރ. މުއިއްޒު ވަނީ ރާއްޖޭގައި ތިބި އިންޑިއާ ސިފައިން ފޮނުވާލާނެ ކަމަށް ވެސް ވިދާޅުވެފައެވެ.