ފާއިތުވި ރިޔާސީ އިންތިޚާބުގެ ނަތީޖާ ގަބޫލުކުރައްވާ، އިންތިޚާބުން ބަލިވެވަޑައިގެންނެވި ނަމަވެސް ރައީސް ސާލިހު ދެއްކެވި ނަމޫނާއަށް އިލެކްޝަންސް ކޮމިޝަނުން ޝުކުރު އަދާ ކޮށްފިއެވެ.
ރިޔާސީ އިންތިޚާބުގެ ރަސްމީ ނަތީޖާ އިއުލާން ކުރުމަށް އިލެކްޝަންސް ކޮމިޝަނުން ބޭއްވި ރަސްމިއްޔާތުގައި ވާހަކަ ދައްކަވަމުން އެކޮމިޝަންގެ ނާއިބު ރައީސް އިސްމާއިލް ހަބީބު ވިދާޅުވީ ފާއިތުވީ ރިޔާސީ އިންތިޚާބު ތަކުގައި ބަލިވީ ފަރާތްތަކުން އިންތިޚާބުގެ ނަތީޖާ ބަލައިނުގަނެ އެކި ތުހުމަތުތައް ކޮށްފައިވާކަމުގައެވެ.
އަދި ހަބީބު ވިދާޅުވި މިފަހަރުގެ ރިޔާސީ އިންތިޚާބުގައި ބަލިވެވަޑައިގެންނެވި ރައީސް ސާލިހުގެ ކިބައިން ފެނިގެން ގޮސްފައިވަނީ ޑިމޮކްރަސީގެ ރިވެތި ނަމޫނާއެއް ކަމުގައެވެ.
މިފަހަރު ފެނިގެންދިޔައީ ޑިމޮކްރަސީގެ ވަރަށް ރީތި މިސާލެއް. ރިޔާސީ އިންތިޚާބު ކާމިޔާބު ނުކުރެއްވުނު ނަމަވެސް ޑިމޮކްރަސީގެ ހަމަތަކުން އިންތިޚާބުގެ ނަތީޖާ ގަބޫލު ކުރައްވައި އެކަން އިއުލާން ކޮށްދެއްވި ކަމަށްޓަކައި ދިވެހި ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް އިލެކްޝަންސް ކޮމިޝަންގެ ފަރާތުން ޝުކުރު ދަންނަވަން.
ހަބީބް ވިދާޅުވިއެވެ.
ހަބީބު އިތުރަށް ވިދާޅުވެފައިވަނީ މި ރިޔާސީ އިންތިޚާބުގެ ހުރިހާ ކަމެއްވެސް އަމާންކަމާއި އޮމާންކަމާއެކު ކުރިޔަށް ދިއުމަކީ ރާއްޖޭގެ ޑިމޮކްރަސީއަށް ލިބިގެންދިޔަ ވަރަށް ބޮޑު ކުރިއެރުމެއް ކަމުގައެވެ.
ބޮޑު އަޣްލަބިއްޔަތަކުން މިފަހަރުގެ ރިޔާސީ އިންތިޚާބު ކާމިޔާބު ކުރައްވާފައިވަނީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒުއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ވާދަކުރައްވާ ޑރ.މުޢިއްޒު އިންތިޚާބު ކާމިޔާބުކުރެއްވީ ވޯޓުލީ މީހުންގެ 54.04 (129،159 ވޯޓު) އިންސަތަ ވޯޓާއެކުއެވެ. އަދި ރައީސް ޞާލިޙަށް ލިބިވަޑައިގަތީ 45.96 (109،868 ވޯޓު) އިންސައްތަ ވޯޓެވެ.
ކޮމެންޓު ފޮނުވާ