އިންތިޚާބީ ރައީސް ޑރ. މުޙައްމަދު މުއިއްޒު، ބްރިޓިޝް ހައި ކޮމިޝަނަރު ކެރޮން ރޮސްލާއާއި ބައްދަލުކުރައްވައިފިއެވެ. މި ބައްދަލުކުރެއްވުން އޮތީ ޑރ.މުޢިއްޒުގެ ގެކޮޅު މ.ދިމްޔާތުގައެވެ.
ރިޔާސީ އިންތިޚާބު ކާމިޔާބުކުރެއްވުމަށްފަހު ޑރ.މުޢިއްޒު ބައްދަލުކުރެއްވި ބޭރުގެ ފުރަތަމަ ސަފީރަކީވެސް ބްރިޓިޝް ސަފީރު ރޮސްލާއެވެ. މި ބައްދަލުކުރެއްވުމުގައި އިންތިޚާބީ ނާއިބު ރައީސް ހުސައިން މުޙައްމަދު ލަޠީފްވެސް ބައިވެރިވެވަޑައިގެންނެވިއެވެ.
ޑރ.މުޢިއްޒު ވަނީ އެމަނިކުފާނުގެ ޚަރިޖީ ސިޔާސަތަކީ އެއްވެސް ޤައުމެއް ތަފާތުނުކުރާނެ ސިޔާސަތެއްކަަމަށެވެ.
މުއިއްޒު ވިދާޅުވެފައިވަނީ އެމަނިކުފާނުގެ ވެރިކަމެއްގައި ރާއްޖޭގެ ޚާރިޖީ ސިޔާސަތަކީ ވަކި ޤައުމަކަށް އެކަނި ބަރޯސާ ވާނެ ކަމެއް ނޫންކަމަށެވެ. ކިތަންމެ ކުޑަ ޤައުމެއް ވިޔަސް، އަދި ކިތަންމެ ބޮޑު ޤައުމެއް ވިޔަސް ގާތްކަން ފަމަހައްޓާނެ ކަމަށާއި، އަދި ގާތް އެކުވެރި ޤައުމުތަކާއި ޢަރަބި އިސްލާމީ ޤައުމުތަކާއި އޮތްނަން ގުޅުން އިތުރަށް ހަރުދަނާ ކުރާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ދިވެހިންގެ މިނިވަންކަމާއި ސިޔާސަތާއި އިސްތިޤުލާލު ރައްކާތެރި ކުރުމަކީ ކޮންމެ ދިވެހި ރައްޔިތެއްގެ ޒިންމާއެއް ކަމަށެވެ. އަދި ދިވެހިންގެ މިނިވަންކަމަށް އެހެން ޤައުމުތަކުންވެސް އިހުތިރާމް ކުރުމަކީ ކުރަންޖެހޭ ކަމެއްކަމަށެވެ. މިހާރުވެސް ރާއްޖޭގައި މިނިވަންކަމާއި ގުޅޭ އެތައް ކަންބޮޑުވުމެއް އޮތްއިރު އެކަންކަން ބަދަލުކޮށް މިނިވަން މުސްތަގިއްލު ޤައުމަކަށް މިޤައުމު ހަދާނޭކަމުގެ ޔަގީންކަން މުއިއްޒު ވަނީ ދެއްވާފައެވެ.