ރިޔާސީ އިންތިޚާބުގެ ރަސްމީ ނަތީޖާ މިރޭ އިއުލާންކުރަން އިލެކްޝަންސް ކޮމިޝަނުން ނިންމައިފިއެވެ. މިއަހަރުގެ ރިޔާސީ އިންތިހާބު ކާމިޔާބު ކުރައްވާ ކެނޑިޑޭޓަކަށް އިންތިހާބު ކާމިޔާބު ކުރެއްވިކަމުގެ ރަސްމީ ލިޔުމެއް ހަވާލުކުރައްވާނެކަމަށް އިލެކްޝަންސް ކޮމިޝަނުން ވަނީ މީގެ ކުރިން ހާމަކޮށްފައެވެ.
އިލެކްޝަންސް ކޮމިޝަންގެ ނައިބު ރައީސް އިސްމާޢިލް ޙަބީބް ވިދާޅުވެފައިވަނީ ރިޔާސީ އިންތިޚާބުގެ ރަސްމީ ނަތީޖާ މިރޭ 0830 ގައި އިޢުލާންކުރެއްވުމަށް ނިންމަވާފައިވާ ކަމަށެވެ. ރަސްމީ ނަތީޖާ ޢިއުލާންކުރުމަށް ހަމަޖެހިފައިވަނީ ދަރުބާރުގޭގައެވެ. އަދި މި ރަސްމިއްޔާތުގައި ރައީސްކަމަށް އިންތިޚާބުވިކަމުގެ ލިޔުންވެސް މިރޭ ހަވާލުކުރާނެކަމަށް އީސީން ބުންޏެވެ.
އިންތިޚާބުގެ ވަގުތީ ނަތީޖާއާއި ޖުމްލަ ނަތީޖާ ޢިއުލާންކޮށްފައެވެ. ބޮޑު އަޣްލަބިއްޔަތަކުން މިފަހަރުގެ ރިޔާސީ އިންތިޚާބު ކާމިޔާބު ކުރައްވާފައިވަނީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒުއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ވާދަކުރައްވާ ޑރ.މުޢިއްޒު އިންތިޚާބު ކާމިޔާބުކުރެއްވީ ވޯޓުލީ މީހުންގެ 54.04 އިންސަތަ ވޯޓާއެކުއެވެ. އަދި ރައީސް ޞާލިޙަށް ލިބިވަޑައިގަތީ 45.96 އިންސައްތަ ވޯޓެވެ.
އިންތިޚާބުގެ ކަންކަން އިލެކްޝަންސް ކޮމިޝަނުން ގެންދަވާފައިވަނީ ދެފުށްފެންނަ އަދި ރައްޔިތުންގެ އިތުބާރު އިންތިޚާބަށް އޮންނާނެ ފަދަ ގޮތަކަށް ކަމަށް ރާއްޖެއާއި ރާއްޖެއިން ބޭރުން އިންތިޚާބު އޮބްޒަރވްކުރި ޖަމިއްޔާތަކުންވަނީ ބުނެފައެވެ.
