މާލެ ސިޓީ ކައުންސިލްގެ މޭޔަރުގެ ޒިންމާތައް ޑެޕިއުޓޫ މޭޔަރު އަހުމަދު ނަރީޝްއާ ހަވާލުކުރަން ނިންމައި ރައީސް ކަމުގެ ހުވާ ކުރެއްވުމުގެ ކުރިން ކުރައްވަންޖެހޭ މުހިންމެ މަސައްކަތްތަކަށް ވަގުތު ހުސްކުރެއްވުމަށް އިންތިޚާބީ ރައީސުލްޖުމްހޫރިއްޔާ އަދި މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ނިންމަވައިފިއެވެ.
ޑރ. މުއިއްޒު ބައިވެރިވެ ވަޑައިގެން މިއަދު ކުރިއަށް ގެންދެވި މާލެ ސިޓީ ކައުންސިލްގެ އެންމެ ފަހު ބައްދަލުވުމުގައި މުއިއްޒު ވަނީ މާލެ ސިޓީ ކައުންސިލްގެ މެމްބަރުންގެ ފަރާތުން އިންތިޚާބުގެ ތެރޭގައި ލިބިވަޑައިގެންނެވި އެއްބާރުލުން ފާހަގަ ކުރައްވާ ޝުކުރު އަދާ ކުރައްވާފައެވެ. މުއިއްޒު ވިދާޅުވީ، އެމަނިކުފާނު ރައީސްކަމަށް އިންތިހާބުވީ ނަމަވެސް ނޮވެމްބަރު 17، ގައި ރައީސުލްޖުމްހޫރިއްޔާގެ މަގާމުގެ ހުވާކުރެއްވުމާ ހަމައަށް މަގާމުގައި ހުންނަވާނެ ކަމަށެވެ. އެހެން ނަމަވެސް މާލެ ސިޓީ މޭޔަރުގެ ޒިންމާތައް މިއަދުން ފެށިގެން ޑެޕިއުޓީ މޭޔަރު ނަރީޝްއާ ހަވާލުކުރައްވާނެ ކަމަށް ވިދާޅުވިއެވެ.
ނޮވެމްބަރު 17 އާއި ހަމައަށް އަޅުގަނޑަށް މޭޔަރުކަމުގައި ހުރެވޭނެ. އެހެން ނަމަވެސް ޒިންމާތައް ލީގަލް ޓީމް އަދި އެލްޖީއޭ މެދުވެރިކޮށް ބެލި އިރު ފުރުސަތު އެބަ އޮތް ޑެޕިއުޓީ މޭޔާއާ ހަވާލުކުރެވުމުގެ. އަޅުގަނޑު ގަބޫލު ކުރާ ގޮތުގައި އެންމެ އިންސާފުވެރި ގޮތަކަށްވާނީ އަޅުގަނޑަށް މި ޓްރަސްސިޝަން ޕީރިއަޑްގައި، ޓްރާންސިޝަން މަސައްކަތަށް ވަރަށް ވަގުތު ދޭން ބޭނުން.
– ޑރ. މުއިއްޒު ވިދާޅުވިއެވެ.
މުއިއްޒު ވިދާޅުވީ ވެރިކަމުގެ މަސްއޫލިއްޔައި ރަސްމީކޮށް ހަވާލު ވުމުގެ ކުރިން ކުރިއަށްދާ ޓްރާސްސިޝަން މަސައްކަތްތައް ވަރަށް ގާތުން ބައްލަވަން ބޭނުންވާކަމަށެވެ. ވެރިކަމަށް ވަޑައިގެންނެވުމަށް ހުށަހެޅުއްވި މެނިފެސްޓޯގައިވާ ކަންކަން ފުރަތަމަ ދުވަހުން ފެށިގެން ކުރިއަށްދާނެ ކަމަށް މުއިއްޒު ވިދާޅުވިއެެވެ.
އަޅުގަނޑު ބޭނުން ޓްރާންސިޝަންގެ މަސައްކަތްތައް، ކޮމެޓީތައް ހިނގާގޮތް، ބަލައި އެހީތެރިކަންދީ އެ މަސައްކަތައް ހުރިހާތަނަކުން ހޯދަންވާ މައުލޫމާތުތައް އެއްކޮށް އެނަލައިޒްކޮށް ޕްލޭންކުރަން. އަޅުގަނޑު މަސައްކަތް ކުރަނީ މެނިފެސްޓޯގެވެސް ޕްލޭނެއް އޮވެގެން ޕްލޭނެއްގެ ތެރެއިން މަސައްކަތް ކުރަން.
– ޑރ. މުއިއްޒު ވިދާޅުވިއެވެ.
ޑރ. މުއިއްޒު ވެރިކަމުގެ ހުވާ ކުރައްވާނީ އަންނަ މަހުގެ 17 ވަނަ ދުވަހުއެވެ. ވެރިކަމުގެ ހުވާ ކުރައްވާނީ އެކަމަށްޓަކައި ޚާއްސަ ކުރެވިގެން ބާއްވާ ބޮޑު ރަސްމިއްޔަތެއްގައެވެ.
