ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) އަށް ހަމަލާ ދިނުމުގެ ތުހުމަތުގައި 4 މީހަކު ހައްޔަރު ކޮށްފައިވާކަން ފުލުހުންގެ އިދާރާއިން ހާމަ ކޮށްފިއެވެ.
ފުލުހުން އާންމުކުރި ބަޔާނެއްގައި ބުނެފައިވަނީ ޝަރީފަށް ހަމަލާދިނުމުގެ ތުހުމަތުގައި ހައްޔަރުކޮށްފައިވަނީ 27 އަހަރުގެ ފިރިހެނަކާއި އުމުރުން 24 އަހަރުގެ ތިން ފިރިހެނުން ކަމަށެވެ.
ގުރޫޕަކުން ޝަރީފަށް ހަމަލާ ދިނީ މިދިޔަ ހޮނިހިރު ދުވަހު ރިޔާސީ އިންތިހާބުގެ ދެވަނަ ބުރުގެ ވޯޓުލުން ކުރިއަށް ދަނިކޮށް މާލޭގައި ހުންނަ މެންހަޓަން ހޮޓަލް ތެރެއިންނެވެ.
މި ހަމަލާއާ ގުޅިގެން ޝަރީފުގެ މޫނުމައްޗަށް ވަނީ ގެއްލުންތަކެއް ލިބިފަ އެވެ.
ޝަރީފަށް ހަމަލާ ދިން ދުވަހު ފޭދޫ ދާއިރާގެ އެމްޑީޕީ މެންބަރު މުހައްމަދު ނިހާދަށް ވެސް ހަމަލާ ދީފައިވެ އެވެ.
