ޕީޕީއެމް/ޕީއެންސީގެ ވެރިކަމެއްގައި ފިތުރު އީދާއި އަޟްހާ އީދުގައި ހުރިހާ ސިޓީތަކަކާއި ވެރިކަން ކުރާ ރަށްތަކުގައި ބޮކި ދިއްލައި ޒީނަތްތެރިކޮށް، ތަކުބީރުގެ އަޑުން ގުގުމާލާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގައި ހޯއްދެވި ބޮޑު ކާމިޔާބީ ފާހަގަ ކުރަން ސޯޝަލް ސެންޓަރުގައި ބޭއްވި ޖަލްސާގައި މުއިއްޒު ވިދާޅުވީ އިންތިހާބުގެ ނަތީޖާ އިން އެނގިގެން ދިޔަ އެއް ކަމަކީ ރާއްޖޭގައި އިސްލާމް ދީން އޮތުމުގެ މުހިންމު ކަން ކަމަށެވެ.
ދިވެހިންނަކީ މާތްވެގެންވާ އިސްލާމް ދީނަށް ލޯބި ކުރާ ދިވެހި ގައުމުގައި އިސްލާމް ދީނަށް ނަސްރުދޭ، އިސްލާމީވަންތަކަން ދިރުވައި އާލާ ކުރާ މުޖުތަމައުއަކަށް ހަދަން ކޮންމެ ބޭފުޅަކު ބޭނުންވާ ކަމަށް އެމަނިކުފާނު ވިދާޅުވިއެވެ.
"އެކަން އަޅުގަނޑަށް އިހްސާސްވެގެން ދިޔަ އީދު ދުވަހު މާލޭގައި މާލެ ސިޓީ ކައުންސިލުން ބޮކި ދިއްލައި ތަކުބީރު އިއްވީމަ ރައްޔިތުންގެ ހިތަށް ލިބުނު އުފަލާއި ފާޅުކުރަމުން ދިޔަ ޝުއޫރުތަކާއި ނަގަމުން ދިޔަ ސެލްފީތަކާއި އަޅުގަނޑާ ބައްދަލުވެ ދެއްކި ވާހަކަތަކާ މި ހުރިހާ ކަމަކުން ފެނިގެން ދިޔަ އެކަން." މުއިއްޒު ވިދާޅުވިއެވެ.
މުއިއްޒު ވިދާޅުވި ގޮތުގައި ކުރިއަށް އޮތް ތަނުގައި ދެން ފެންނާނީ ރާއްޖޭގެ ހުރިހާ ސިޓީއަކާއި ވެރިކަން ކުރާ ރަށްތަކުގައި ފުރަތަމަ ފަހަރަށް އެކަން ކުރާ ތަނެވެ.
"އިރާދަކުރެއްވިއްޔާ މާލެ ސިޓީގައި އެކަން ކުރެވިގެން ދިޔައީ، ދެން ފެނިގެން ދާނީ ރާއްޖޭގެ ހުރިހާ ސިޓީއެއްގައި ވެރިކަން ކުރާ ރަށްތަކުގައި ފުރަތަމަ ފަހަރަށް އެކަން އަޅުގަނޑުމެން ކުރާނަން." މުއިއްޒު ވިދާޅުވިއެވެ.
މި އަހަރުގެ އަޟްހާ އީދަށް މާލޭގެ އެކި ހިސާބުތަކުގައި ސްމާޓް ސްޓްރީޓް ލައިޓްތައް ދިއްލާލައި އެ ލައިޓްތަކުން ތަކުބީރުގެ އަޑު އިވޭ ގޮތް މާލެ ސިޓީ ކައުންސިލުން ހެދީ މިދިޔަ ޖޫން މަހުގެ ތެރޭގައެވެ. މިއީ އަޟްހާ އީދަކާ ދިމާކޮށް މާލެ މިހާ ބޮޑަށް ޒީނަތްތެރިކޮށްލި ފުރަތަމަ ފަހަރެވެ.
މާލެ ސިޓީ ދިއްލާލައި ތަކުބީރުގެ އަޑުން ގުގުމާލަން ނިންމީ މާލޭގައި އީދެއް ފާހަގަ ކުރާ ކަން އިހްސާސްކޮށް ދިނުމާއި މާލޭގައި ދިރިއުޅޭ ރައްޔިތުންނަށް އީދުގެ އުފާވެރި ކަން ގެނެސް ދިނުމުގެ ބޭނުމުގައެވެ. އަޟްހާ އީދުގައި މާލެ ތެރެ ޒީނަތްތެރި ކުރުމުންނާއި ތަކުބީރުގެ އަޑުން ގުގުމާލުމާ ގުޅިގެން ގިނަ ބައެއްގެ ތައުރީފް އޭރު ސިޓީ ކައުންސިލަށް ލިބިފައިވެއެވެ.
