ކުރަންޖެހޭ މިންވަރާއި ގާތަށްވެސް މަޝްވަރާ ނުކޮށް ތެޅި ފޮޅި ގަނެގެން މިހާރު ވެރިކަން ކުރަމުންދާ ނިޒާމު ބަދަލު ކުރުމަށް ކުރާ މަސައްކަތަށް ތާއީދު ނުކުރައްވާ ކަމަށް ރައްޔިތުންގެ މަޖިލީހުގެ މެޖޯރިޓީ ޕާޓީގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިހެން ވިދާޅުވީ ރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމަށް ޑިމޮކްރެޓްސްގެ މެމްބަރުން މަޖިލީހަށް ހުށަހަޅާފައިވާ ޤަރާރުގެ ބަހުސްގައެވެ.
އަސްލަމް ވިދާޅުވީ ޤާނޫނު އަސާސީ ކުރިން އޮތް ގޮތުން ރައްޔިތުންގެ ފެންނަ ނުފެންނަ ވޯޓަކަށް އެހުމަށް ރައްޔިތުންގެ ކައިރިއަށް ނުގޮސްވެސް ކުރެވިދާނެކަމަށެވެ. ނަމަވެސް މިހާރު ޤާނޫނު އަސާސީއަށް މިފަދަ ބޮޑު އިސްލާހެއް ގެންނަން ނަމަ ރައްޔިތުންގެ ފެންނަ ނުފެންނަ ވޯޓެއް ނަގައިގެން ނޫނީ މިވަރުގެ ކަމެއް ކުރުމަކީ ޤާނޫނު އަސާސީ ތަންދޭ ކަމެއް ނޫންކަމަށް އަސްލަމް ވިދާޅުވިއެވެ.
އަޅުގަނޑުމެން އަވަސް އަރުވާލައިގެން އަދި އަޅުގަނޑުމެންގެ މެޖޯރިޓީއެއް މަޖިލީހުގައި އޮތަތީވެ އޭގެ ނަހަމަ ބޭނުން ހިފައި ވަކިން ޚާއްސަކޮށް ވެރިކަމުގެ ނިޒާމުފަދަ ކަންކަން ބަދަލު ކުރެވިގެން ދިއުމަކީ މުޅި ޤައުމަށް ހުރި ރަނގަޅު ގޮތެއްކަމަށް އަޅުގަނޑަށް ގަބޫލު ނުކުރެވޭ. މިކަމުގައި ސިޔާސީ ޕާޓީތަކުން ދެކޭ ގޮތެއްވެސް ބަލަންޖެހޭ.
– އަސްލަމް ވިދާޅުވިއެވެ.
މި މަހު 30ގެ ކުރިން ނަގަން ނިންމާފައި އިލެކްޝަންސް ކޮމިޝަނަށް އަންގާފައި އޮތް ނިޒާމީ ވޯޓު، އެ ތާރީޚުގައި ނުނެގޭނެ ކަމަށް، އެ ވޯޓު ނަގަން އެންމެ ބޮޑަށް ވަކާލާތު ކުރައްވައި ދަ ޑިމޮކްރެޓްސްގެ މެންބަރުން މިއަދު މަޖިލީހުގައި ވަނީ ގޮވާލާފައެވެ.
ވެރިކަމުގެ ނިޒާމު ބަދަލުކުރުމަށް ރައްޔިތުންގެ ހިޔާލު ހޯދުމުގެ ވޯޓެއް ނަގަން މަޖިލީހަށް ގަރާރެއް ހުށަހެޅީ ހުޅުދޫ ދާއިރާގެ މެންބަރު އިލްޔާސް ލަބީބެވެ. މި ވޯޓު މިމަހުގެ 30 ވަނަ ދުވަހުގެ ކުރިން ނެގުމަށް މަޖިލީހުން ވަނީ ފާސްކޮށްފައެވެ.
