ދެން އުފެދޭ ޕީޕީއެމް/ޕީއެންސީގެ ވެރިކަމެއްގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލަން ދިން ނުރައްކަތެރި ބޮމުގެ ހަމަލާގެ މައްސަލަ ބަލައި ރައީސް ނަޝީދަށް އިންސާފު ހޯއްދަވައި ދެއްވާނެ ކަމަށް އިންތިހާބީ ރައީސް، ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުން ލިބުނު ކާމިޔާބީ ފާހަގަކޮށް، ރައްޔިތުންނާއި މިރޭ ބައްދަލު ކުރައްވައި މުއިއްޒު ވިދާޅުވީ، އެމަނިކުފާނު ކެމްޕޭން ދަތުރުތަކުގައި ވެސް ހުރިހާ ރައްޔިތުންނަށް ހަމަހަމަކަމާއި އެކީ އިންސާފު ހޯއްދަވައި ދެއްވާނެ ކަމަށް ފާހަގަ ކުރެއްވި ކަމަށެވެ.
އެއިންސާފު ހޯދައި ދިނުމުގެ ދަތުރުގެ ތެރެއިން ޖަލު ހުކުމެއް އިއްވާފައިވާ ކުރީގެ ރައީސް، ޔާމީން އަބްދުލްގައްޔޫމުގެ ތެރެއިން މަޖިލީހުގެ ރައީސް، ރައީސް މުހައްމަދު ނަޝީދަށް ވެސް އިންސާފު ހޯއްދަވައިދެއްވާނެ ކަމަށް މުއިއްޒު ވިދާޅުވިއެވެ. މުއިއްޒު ވިދާޅުވީ، ރައީސް ނަޝީދަށް ދިން ބޮމުގެ ހަމަލާގެ މައްސަލަ މި ސަރުކާރުން ނުބަލާ ކަމަށާއި އެމަނިކުފާނަށް އިންސާފުވެސް ހޯއްދަވައި ދެއްވާފައި ނުވާ ކަމަށެވެ.
އެމަނިކުފާނަށް މަޖީދީ މަގުގައި ދިން އުދުވާނީ ހަމަލާ މި ސަރުކާރުން އެކަން ނުބަލާ، އިންސާފެއް ގާއިމު ނުކޮށްދޭ. ދެ ފަހަރަކު އަޅުގަނޑު ޕޯޑިއަމްގައި އެވާހަކަ ދެއްކިން. އަނެއްކާ ދަންނަވާލަން ބޭނުން، އިރާދަ ކުރެއްވިއްޔާ އަޅުގަނޑުމެންގެ ސަރުކާރުގައި އެމަނިކުފާނަށް ވެސް އިންސާފު ހޯދައި ދޭނަން.
– މުއިއްޒު ވިދާޅުވިއެވެ.
މެއި 6، 2021 ވަނަ ދުވަހު ނަޝީދަށް އަމާޒުކޮށް މާލޭގައި ދިން ބޮމުގެ ހަމަލާގައި ނަޝީދަށް ސީރިއަސް އަނިޔާތަކެއް ލިބިވަޑައިގެންފައިވެއެވެ. އެމަނިކުފާނަށް ފަރުވާ ދިނުމަށް އެންމެ ފުރަތަމަ ގެންދިޔައީ އޭޑީކޭ ހޮސްޕިޓަލަށެވެ. އެ ހޮސްޕިޓަލްގައި ނަޝީދު ވަނީ އޮޕަރޭޝަނެއް ވެސް ކުރައްވައިފައެވެ
އޭޑީކޭގައި ފަރުވާ ހޯއްދެވުމަށް ފަހު، ނަޝީދު އިތުރު ފަރުވާ ހޯއްދެވުމަށް ވަޑައިގަތީ އާއިލާއާ އެކުގައި ޖަރުމަނަށެވެ. ޖަރުމަނުގައި ހުންނަ މިލިޓަރީ ހޮސްޕިޓަލެއްގައި ފަރުވާ ހޯއްދެވުމަށް ފަހު، އިނގިރޭސި ވިލާތަށް ވަޑައިގެން އެ ގައުމުގައި ވެސް އެމަނިކުފާނު ފަރުވާ ހޯއްދެވިއެވެ.
