އިއްޔެ ބޭއްވި ރިޔާސީ އިންތިހާބުގެ ދެވަނަ ބުރުގައި ގދ. ވާދޫގައި ބެހެއްޓި ވޯޓު ފޮއްޓެއް ފަޅާލި މީހާގެ ބަންދަށް ދެ މަސް ދުވަސް ޖަހައިފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ އުމުރުން 35 އަހަރުގެ ދިވެހި ފިރިހެނެކެވެ. އެނގިފައިވާ ގޮތުގައި އެމީހާ ވޯޓު ފޮށި ފަޅާލާފައި ވަނީ އައިޑީކާޑް ނެތުމުން ވޯޓު ނުލެވޭނެ ކަމަށް އެންގުމުން އެކަމާ ރުޅި އައިސްގެންނެވެ.
ފުލުހުންގެ މީޑިއާ އޮފިޝަލަކު ވިދާޅުވީ އޭނާގެ ބަންދުގެ މުއްދަތު ޖެހުމަށް މިއަދު ކޯޓަށް ގެންދުމުން ބަންދަށް، 60 ދުވަސް ޖަހާފައިވާ ކަމަށެވެ.
އިއްޔެ ރިޔާސީ އިންތިހާބުގެ ވޯޓުލުމުގެ ދެވަނަ ބުރު ކުރިއަށް ދިޔައިރު އެހާ ބޮޑު ހަމަނުޖެހުންތަކެއް ނުހިނގައެވެ. ނަމަވެސް ގޭންގުތަކުން ވަރަށް ބޮޑަށް ހަރަކާތްތެރިވާކަން ފާހަގަ ކުރެވިގެން ފުލުހުން ވަނީ މާލެ ތެރޭގައި ސަލާމަތީ ކަންކަން ވަރުގަދަކޮށްފައެވެ.
ދެވަނަ ބުރުގެ ނަތީޖާ އަށް ބަލާ އިރު، އިދިކޮޅު ކެންޑިޑޭޓު ޑރ. މުހައްމަދު މުއިއްޒު ވަނީ 129،159 ވޯޓު ހޯއްދަވައިފައެވެ. މުއިއްޒާ ވާދަކުރެއްވި އެމްޑީީގެ ރިޔާސީ ކެންޑިޑޭޓް ރައީސް އިބްރާޙިމް މުހައްމަދު ސޯލިހަށް ލިބިވަޑައިގެންފައި ވަނީ 109،868 ވޯޓެވެ.
