ރިިޔާސީ އިންތިޚާބުގެ ދެވަނަ ބުރުގައި ކުރީގެ ރައީސް އަލް އުޘްތާޒު މައުމޫން އަބްދުލް ޤައްޔޫމްގެ ދެ ކަނބަލުން ވޯޓު ލައްވައިފިއެވެ.
ރައީސް މައުމޫނާއި، އަނބިކަނބަލުން ނަސްރީނާ އިބްރާހިމް ވޯޓު ލެއްވީ ސްރީލައްކާގައި ބަހައްޓާފައިވާ ވޯޓު ފޮއްޓަށެވެ. ރައީސް މައުމޫންގެ ދެކަނބަލުން މިވަގުތު ތިއްބެވީ ލަންކާގައެވެ. ރައީސް މައުމޫނަކީ އިންތިޚާބު ތަކުގައި ވޯޓު ލެއްވުމަށް ޚާއްސަ ސަމާލުކަމެެއް ދެއްވައި ކޮންމެ އިންތިޚާބެއްގައިވެސް ކޮންމެ ތާކު ހުރި ނަމަވެސް ބަރާބަރަށް ވޯޓު ދެއްވާ ފަރުދީ ޒިންމާ އަދާ ކުރައްވާ ބޭފުޅެކެވެ.
ކުރީގެ ރައީސުންގެ ތެރެއިން މިތާނަށް ރައީސް ޔާމީނާއި، ރައީސް ނަޝީދާއި، ރައީސް މައުމޫން ވޯޓު ލައްވާފައިވާއިރު، ޑރ. ވަހީދު އަދި ވޯޓެއް ނުލައްވައެވެ.
މިފަހަރުގެ ރިޔާސީ އިންތިޚާބުގައި 282،804 މީހުންނަށް ވޯޓުލުމުގެ ޙައްޤު ވަނީ ލިބިފައެވެ. މިއަދު ހެނދުނު 8 ޖެހުމާއެކު މާލެއާއި އަތޮޅުތަކުގައި ވޯޓުލުމުގެ ކަންކަން ވަނީ ފަށާފައެވެ. ފުރަތަމަ ބުރުގެ ތަޖުރިބާއަށް ބަލާ ވީހާވެސް ގިނަ ރައްޔިތުންނަށް ވޯޓުލުމުގެ ފުރުޞަތު ފަހިކޮށްދިނުމުގެ ގޮތުން މިފަހަރު އިލެކްޝަންސް ކޮމިޝަނުން ވަނީ ވޯޓުލާ ގަޑިއަށް އިތުރު އެއްގަޑިއިރު އިތުރުކޮށްދެއްވާފައެވެ.
އެގޮތުން ރިޔާސީ އިންތިޚާބުގެ ދެވަނަ ބުރުގެ ވޯޓުލުން މިއަދު ހެނދުނު 8 ފެށިގެން ހަވީރު 5 ޖެހުމާއި ހަމައަށް ކުރިއަށްދާނެއެވެ. ހެނދުނު 7:30 އިން ފެށިގެން ވޯޓުލާ މަރުކަޒުތަކުގައި އާއްމުން ވަނީ ކިޔުތައް ހަދަން ފަށާފައެވެ. ވޯޓުލާން ފުރަތަމަ އައި 2 މީހުންގެ ހާޒިރުގައި ސެކިޔުރިޓީ އުރަ ކެނޑުމަށްފަހު، 8 ޖެހިއިރު ވަނީ ވޯޓުލުން ފަށާފައެވެ.
