މާދަމާ އޮންނަ ރިޔާސީ އިންތިޚާބު ކާމިޔާބުކުރާ ކެންޑިޑޭޓަށް އިންތިޚާބުވިކަމުގެ ރަސްމީ ލިޔުމެއް ދެއްވުމަށް އިލެކްޝަންސް ކޮމިޝަނުން ނިންމައިފިއެވެ.
އެކޮމިޝަނުން މިރޭ ބޭއްވި ނޫސްވެރިންގެ ބައްދަލުވުމުގައި އީސީގެ ނާއިބު ރައީސް އިސްމާޢީލް ހަބީބު ވިދާޅުވީ، އިންތިޚާބުވާ ކެންޑިޑޭޓަށް ލިޔުމެއް ދިނުމަށް ނިންމި ފުރަތަމަ ފަހަރުކަމަށެވެ. އެކަމަށްޓަކަިއ ޚާއްޞަ ރަސްމިއްޔާތެއް ބޭއްވުމަށް ނިންމާފައިވާކަމަށްވެސް ހަބީބު ވިދާޅުވިއެވެ.
އެއީ މިފަހަރު ރިޔާސީ އިންތިޚާބުގައި ހޮވިވަޑައިގަންނަވާ ކެނޑިޑޭޓަކަށް ރަސްމީ ނަތީޖާއަކާއިއެކީގައި އެބޭފުޅަކު ހޮވިވަޑައިގެންނެވި ކަމުގެ ރަސްމީ ލިޔުން ރަސްމިއްޔާތެއްގެ ތެރެއިން އަޅުގަނޑުމެން އެ ކެންޑިޑޭޓަކާއި ހަވާލުކުރުން ކޮމިޝަނުން ނިންމާފައި އޮތީ. އިރާދަކުރެއްވިއްޔާ ރަސްމީ ނަތީޖާއާއިއެކީގައި އެ ރަސްމިއްޔާތު ބާއްވާނަން.
– އިސްމާއީލް ހަބީބު ވިދާޅުވިއެވެ.
މިއީ ރާއްޖޭގައި ޢަމަލުކުރާ ފެހި ޤާނޫނު އަސާސީގެ ދަށުން ރައީސަކު އިންތިޚާބުކުރުމަށް ބާއްވާ 4ވަނަ އިންތިޚާބެވެ. މި އިންތިޚާބުގެ ފުރަތަމަ ބުރު ބޭއްވީ މިމަހުގެ 9ގައެވެ. އެ ބުރުގައި 8 ކެންޑިޑޭޓުން ވާދަކުރިއެވެ. ނަމަވެސް އެއްވެސް ކެންޑިޑޭތަކަށް އިންތިޚާބުގެ 50 އިންސައްތަ ކާމިޔާބު ނުކުރެވުނެވެ. އެހެންކަމުން ދެވަނަ ބުރަށް ދިޔައީ އެންމެ ގިނަ ވޯޓު ހޯދެއްވި ދެ ކެންޑިޑޭޓުންނެވެ. އެއީ ޕީއެންސީގެ ކެންޑިޑޭޓް ޑރ.މުޙައްމަދު މުޢިއްޒުއާއި، އެމްޑީޕީގެ ކެންޑިޑޭޓް ރައީސް އިބްރާހީމް މުޙައްމަދު ޞާލިޙެވެ.
