މި ފާއިތުވި ފަސް އަހަރަކީ ރާއްޖެއަށް ހެމަޖެހުން ގެނުވި ފަސް އަހަރުކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރަށް ކެމްޕެއިން ނިންމުމުގެ ގޮތުން އެމަނިކުފާނު ދެއްވި ވީޑިއޯ މެސެޖުގައި ވިދާޅުވީ ރާއްޖެއަށް ހެޔޮބަދަލުތަކެއް ގެނެވިއްޖެކަމަށާއި، 2018ގެ ކުރިން އޮތް ބޮރުވެރިކަމާއި ނާމާންކަން ނައްތާލެވިއްޖެކަމަށެވެ. ތަރައްޤީގެ ގިނަ މަޝްރޫޢުތައް ހިންގައި ތަފާތުކުރުމެއް ނެތި، އަސާސީ ޚިދުމަތް ފޯރުކޮށްދިނުމުގައި ކާމިޔާބީތަކެއް ހާސިލްކުރެވިއްޖެކަމަށްވެސް ރައީސް ވިދާޅުވިއެވެ. އަދި ޤައުމަށް ހަމަޖެހުން ގެނެސްދެވިއްޖެކަމަށާއި، މި ހުރިހާކަމެއް ޤައުމަށް ގެނެވުނީ ވަރަށް ގިނަބައެއްގެ އެހީތެރިކަމާއެކުކަމަށްވެސް ރައީސް ވިދާޅުވިއެވެ.
ވޭތުވެދިޔަ ފަސް އަހަރު ދުވަހުގެ ތެރޭގައި މުޅި ދުނިޔެއަށް ކުރިމަތިނުވާވަރުގެ އާލަމީ ބޮޑު ވަބާއަކާ އަޅުގަނޑުމެންނަށް ކުރިމަތިލާންޖެހުނު. އިރާދަކުރެއްވީތީ އެކަމުން އަޅުގަނޑުމެންނަށް މިވަނީ އަރައިގަނެވިފަ. އެކަމުގައިވެސް ވަރަށް ގިނަ ބައެއްގެ ބުރަ މަސައްކަތް ހިމެނިގެން ދިޔަ. އަނެއްކާވެސް މިއަދު އައިސް މިތިބީ ރާއްޖޭގެ މުސްތަޤްބަލާމެދު ގޮތެއް ނިންމުމަށް.
– ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
ރައީސް ވިދާޅުވީ، ވޭތުވެދިޔަ ފަސް އަހަރު ތެރޭގައި ވަކި ދާއިރާއެއް ބާކީނުކޮށް ގިނަ މަސައްކަތްރތަކެއް ކުރެވިފައިވާކަމަށެވެ.
މަސްވެރިކަމާ، ޓޫރިޒަމާ، ދަނޑުވެރިކަމާ، ޓީޗަރުންނާ، ސިއްޙީ ދާއިރާގެ ފަރާތްތަކާއި މިނޫންވެސް އެތައް ސެކްޓަރއެއްގެ މަސައްކަތްކުރާ ބައެއްގެ ދިރިއުޅުމަށް ހެޔޮ ބަދަލެއް ގެނައުމަށް ގިނަ މަސައްކަތްތަކެއް އަޅުގަނޑުމެން މިވަނީ ގެނެވިފަ.
– ރައީސް ވިދާޅުވިއެވެ.
ރައީސް ވިދާޅުވީ މި ފަސް އަހަރު ކުރެވުނު އެންމެ މުހިންމުކަމަކީ ރާއްޖޭގައި ހަމަޖެހުން ޤާއިމްކުރެވުންކަމަށެވެ.
ނިންމަން ޖެހިފައިމިއޮތީ އަނެއްކާވެސް މިރާއްޖެ ހަމަނުޖެހުމާއި، ބިރުވެރިކަމުގެ ތެރެއަށް ދާނީތޯ، ނޫނިއްޔާ އަޅުގަނޑުމެން އެތައްބައެއްގެ ގުރުބާނީ އިސްލާހީ ބަދަލުތަކާއެކުގަ، ޒުވާނުންނަށް މިރާއްޖެ ފޯރުކޮށްދެވުނީތޯ ނިންމަން އޮތް ނިންމުން. އަޅުގަނޑުގެ މިއަދުގެ އެދުމަކީ ރާއްޖޭގެ ލިބުވެތި ރައްޔިތުން މާދަމާ ނިކުމެވަޑައިގެން އަޅުގަނޑުމެން ރާއްޖެ މިގެނައި ހަމަޖެހުމާއެކީގައި ކުރިއަށް ދިއުމަށް އަޅުގަނޑުމެންނަށް ވޯޓު ދިނުން
– – ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
