މާދަމާ ބާއްވާ ރިޔާސީ އިންތިޚާބުގެ ދެވަނަ ބުރާއި ގުޅިގެން ކުރިމަތިވެދާނެ އެއްވެސް ހާދިސާއާއަކަށް ފުލުހުން ފުރިހަމައަށް ތައްޔާރަށް އޮތްކަމަށާއި، އެލއަރޓް ލެވެލް އެންމެ މަތިކޮށްފައިވާކަމަށް ފުލުހުން ވިދާޅުވެއްޖެއެވެ.
ރިޔާސީ އިންތިޚާބާ ގުޅިގެން ސަލާމަތީ ކަންކަން ބެލެހެއްޓުމަށްޓަކައި ފުލުހުން ވަނީ ވޯޓުލުން ކުރިއަށްދާ ހުރިހާ ސަރަޙައްދަކަށް ފުލުހުން ފޮނުވާ "އޮޕަރޭޝަން ބްލޫވޭވް" ގެ ނަމުގައި އޮޕަރޭޝަނެއް ފަށްޓަވާފައެވެ.
ރިޔާސީ އިންތިޚާބުގެ ކޮމާންޑަރ ޗީފް ސްޕްރިންޑެންޓެންޓް އޮފް ޕޮލިސް އަޙްމަދު ޝާކިރު ވިދާޅުވީ ރިޔާސީ އިންތިޚަބަށް ތައްޔާރުވުމަށްޓަކައި މިދިޔަ އަހަރުގެ ޑިސެމްބަރު މަހުން ފެށިގެން ތައްޔާރީތައްވާން ފެށިކަމަށެވެ. އެގޮތުން ވޭތުވެދިޔަ 8 މަސްދުވަހުގެ ތެރޭގައި އިންތިޚާބަށް ތައްޔާރުވުމަށްޓަކައި ފުލުހުން އަމަލުކުރަމުންދާނެ ގޮތުގެ ޕްލޭންތައް ތައްޔާރުކުރިކަން ޝާކިރު ފާހަގަކުރެއްވިއެވެ.
ޝާކިރު ވިދާޅުވީ، އިންތިޚާބުގެ ސަލާމާތާއި ރައްކާތެރިކަން ކަށަވަރުކުރުމަށްޓަކައި މިހާރު ހުރިހާ ސަރަހައްދަކަށް ފުލުހުން ފޮނުވާ ނިންމާފައިވާކަމަށެވެ. އަދި ވޯޓުލަން ފަށާ ހިސާބުން ފެށިގެން ވޯޓުގެ ނަތީޖާ އިޢުލާންކޮށް އަދި އޭގެ ފަހުންވެސް ދިމާވެދާނެ ހާދިސާތަކަށް ފުލުހުން ތައްޔާރަށް އޮތްކަމަށާއި އެލއަރޓް ލެވެލް އެންމެ މަތިކޮށްފައިވާކަމަށެވެ.
ފުލުހުން ވަނީ ކަނޑައެޅިފައިވާ ތަރުތީބުން ވޯޓުލުމުގެ ކަންކަން ކުރިއަށްގެންދިޔުމަށާއި، ވޯޓުލުމަށްފަހު އެ ސަރަޙައްދުގައި މަޑު ނުކުރުމަށް އިލްތިމާސްކުރައްވާފައެވެ. އަދި އިންތިޚާބުގެ ނަތީޖާ ލިބެންދެން ކެތްތެރިކަމާއެކު އަމަލުތައް ބެހެއްޓުމަށާއި، ވޯޓުލާ މީހުންނާއި ކެންޑިޑޭޓުންގެ ހައްޤަށް ހުރުމަތްތެރިކޮށް ހިތުމަށް އިލްތިމާސްކުރައްވާފައެވެ.
ފުލުހުން ވަނީ މިއަހަރުގެ ރިޔާސީ އިންތިޚާބުގައި ބޮޑީވޯން ކެމެރާ ބޭނުން ކުރާ ގޮތަށްވެސް ނިންމާފައެެވެ. ބޮޑީ ވޯން ކެމެރާ އާއިއެކު ފުލުހުން ވޯޓުލާ މަރުކަޒު ތެރޭގައާއި، ޕޯލިން ސިސްޓަމް ތަކުގައިވެސް ހަރަކާތްތެރިވާނެއެވެ. އަދި ކެމެރާ ބޭނުން ކުރާނީ ޤާނޫނުތަކާއި ގަވާއިދުތަކާއި އެއްގޮތަށް ކަމަށް ފުލުހުން ވިދާޅުވެއެވެ. އިންތިޚާބުގެ ކަންކަން އަމާންކަމާއި އޮމާންކަމާއެކު ކުރިއަށް ގެންދިއުމުގައި މުވައްސަސާތަކުން ގުޅިގެން ކުރާ މަސައްކަތުގައި ފުލުހުންގެ ފުރިހަމަ އެއްބާރުލުން އޮންނާނެކަމަށް ފުލުހުން ވިދާޅުވެއެވެ.
