މާދަމާ އޮންނަ ރިޔާސީ އިންތިޚާބުގެ ދެވަނަ ބުރުގެ ވޯޓުގައި މިސަރުކާރުގެ ހެލްތު މިނިސްޓްރީގެ ސްޓޭޓު މިނިސްޓަރުގެ މަގާމު ފުރުއްވައި އެމަޤާމުން އިސްތިއުވާ ދެއްވާފައިވާ ޑރ. ޝާހު މާހިރުގެ ތާއީދު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ދިނުމަށް ނިންމައިފިއެވެ.
ޝާހު މާހިރު ސްޓޭޓް މިނިސްޓަރު ކަމުގެ މަޤާމުން ވަކިވެ އޭނާ ގުޅުނީ ޑިމޮކްރެޓްސް އާއިއެވެ. މިއަދު ކުރެއްވި ޓުވީޓުގައި ޝާހު ވިދާޅުވީ ޑރ. މުއިއްޒުގެ ސިއްޚީ ނިޒާމުގެ މެނިފެސްޓޯގައި ރާއްޖޭގެ ސިއްޚީ ނިޒާމަށް ހެޔޮ ބަދަލެއް ގެނުވާނެ ގިނަ ތަސައްވަރު ތަކެއް ހުރިކަމަށެވެ. އެކަންކަން ގަބޫލު ކުރެވޭތީ މުއިއްޒަށް ދެވަނަ ބުރުގައި ތާއީދު ކުރުމަށް ނިންމާފައިވާކަަމަށެވެ.
މިޤައުމުގެ ސިއްހީ ނިޒާމުވަނީ ބޮޑުތަނުން ރަނގަޅުކުރަންޖެހިފައި. ރައްޔިތުންނަށް މަންފާކުރަނިވި ވަށާޖެހޭ ސިއްހީ ނިޒާމެއް ޤާއިމްކުރަންކެރޭ، ތަސައްވުރު ރަނގަޅު ވެރިއަކު މިއަދު ނުހަނު ބޭނުންވޭ. ސިއްހީނިޒާމު ރަނގަޅު ކުރެވޭނެ މެނިފެސްޓޯއެއް ގެންގުޅުއްވާ ޑރ. މުހައްމަދު މުއިއްޒަށް އަށް އަޅުގަނޑު ތާއީދު!
– ޝާހު މާހިރު ވިދާޅުވިއެވެ.
މާދަމާ އޮންނަ ވޯޓުގައި ޑިމޮކްރެޓްސްގެ ގިނަ ބޭފުޅުންގެ ތާއީދު އޮތީ ޑރ. މުއިއްޒަށެވެ. ޑިމޮކްރެޓްސްގެ އިސް ބޭފުޅުންނ ގެންދަނީ ތަކުރާރުކޮށް ރައީސް ޞާލިހު ނޫންގޮތެއް މިފަހަރު ހޯދަން ޖެހޭކަމަށެވެ. ޑިމޮކްރެޓްސްގެ ގްރާސްރޫޓު އެކީހެން ކަހަލަ ގޮތަކަށް ގެންދަނީ މުއިއްޒުގެ ކެމްޕޭނާއި ގުޅި އިންތިޚާބު ކާމިޔާބު ކޮށް ދެއްވުމަށް ގިނަ މަސައްކަތްތަކެއް ކޮށް ދެއްވަމުންނެވެ.
