މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން ލިމިޓެޑް (އެމްއައިޓީޑީސީ)ގެ ޗެއާމަންގެ މަގާމުގައި ހުންނެވި ޑރ. މުހައްމަދު ކިނާނަތު، އެ މަގާމުން އިސްތިއުފާ ދެއްވައިފިއެވެ.
ޕްރައިވަޓައިޒޭޝަން އެންޑް ކޯ ޕްރަޓައިޒޭޝަން ބޯޑް (ޕީސީބީ) އިން ކުރި ޓުވީޓެއްގައި ބުނީ، ކިނާނަތު، އިސްތިއުފާ ދެއްވުމަށް ހުށަހަޅުއްވާފައިވާތީ، އެ މަގާމުން އޭނާ ވަކިކޮށްފައިވާ ކަމަށެވެ. އެނާ އިސްތިއުފާ ދެއްވި ސަބަބެއް އަދި މިހާތަނަށް ހާމަކޮށްފައި ނުވެއެވެއެވެ.
އޭނާ މަގާމުން ވަކިކުރީ ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި ކޯޕަރަޓައިޒް ކުރުމާއި އަދި މޮނިޓަރކޮށް އިވެލުއޭޓް ކުރުމުގެ ގާނޫނުގައިވާ ގޮތުގެމަތިންނެވެ.
ރައީސް އޮފީހުގެ އިސް މަގާމުތަކުގައި 10 އަހަރަށްވުރެ ގިނަ ދުވަސް ހޭދަ ކުރައްވާފައިވާ ކިނާނަތު މީގެ ކުރިން ވަނީ، ހައްޖު ކޯޕަރޭޝަންގެ ޗެއާމަންކަމާއި އެހެން ބައެއް ކުންފުނިތަކުގެ އިސް މަގާމުތައް އަދާކުރައްވައިފައެވެ. އިންފޮމޭޝަން ސިސްޓަމްގެ ދާއިރާއިން ޕީއެޗްޑީ ހާސިލުކުރައްވާފައިވާ ކިނާނަތު ވަނީ ގައުމީ ޔުނިވާސިޓީގެ އިތުރުން ވިލާ ކޮލެޖުގައިވެސް އިސް މަގާމުތަކެއް ފުރުއްވައިފައެވެ.
