މިފަހަރުގެ ރިޔަސީ އިންތިޚާބުގައި އަލަށް ވޯޓުލެވޭ ޒުވާނުންގެ ބޮޑު ތާއީދެއް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް އޮތްކަން ހާމަކޮށްފިއެވެ.
ރިޔާސީ އިންތިޚާބުގެ ދެވަނަ ބުރުގެ ވޯޓުލުން މާދަމާ އޮންނައިރު، މިއިންތިޚާބުގައި އަލަށް 400 އަށްވުރެ ގިނަ ޒުވާނުން ވޯޓުލާނެއެވެ. އަލަށް ވޯޓުލެވޭ ޒުވާނުން އިސްނަގައިގެން މުއިއްޒުއަށް ތާއީދު ކުރާކަން ހާމަކުރުމަށް އެކި އިވެންޓުތައް ވަނީ ބާއްވާފައެވެ. އެގޮތުން 400 އަށް ވުރެ ގިނަ ޒުވާނުން ބައިވެރިވުމާއެކު ޗަމްޕާ ސެންޓްރަލް ހޮޓެލްގައި ރޭ ބޭއްވި ޒުވާނުންގެ ހާއްސަ އިވެންޓަށް ޑރ. މުއިއްޒުގެ ދެކަނބަލުންނާ، އެމަނިކުފާނުގެ ރަނިންމޭޓް ޙުސައިން މުޙައްމަދު ލަޠީފްވެސް ވަނީ ޒިޔާރަތްކުރައްވައިފައެވެ.
މި އިވެންޓުގައި ޒުވާނުންނާއެކު ގޭމް ކުޅުއްވުމުގައި ޑރ.މުއިއްޒުވެސް ބައިވެރިވެވަޑައިގެންނެވިއެވެ. އަދި އިވެންޓުގައި ބެހެއްޓިފައި ހުރި ފޮޓޯ ބޫތުގައި އަލަށް ވޯޓުލާ ގިނަ ޒުވާނުންނާ، އީ-ގޭމް ކުޅެން ޝައުގުވެރި ގިނަ ޒުވާނުންނާއެކު އޭނާ ވަނީ ފޮޓޯ ނަންގަވައިފައެވެ.
މި އިވެންޓުގައި ވާހަކަ ފުޅު ދައްކަވަމުން ޑރ.މުޢިއްޒު ވިދާޅުވީ އިންޓަނޭޝަނަލް އީސްޕޯޓްސް އެރީނާއެއް މާލޭގެ އިތުރުން، ރާއްޖޭގެ އުތުރާއި، ދެކުނުގެ ދެ ރަށެއްގައި ގާއިމުކޮށްދެއްވާނެ ކަމަށެވެ. މީގެ އިތުރުން ޒުވާނުން މާލޭގައި އުޅޭ ދަތި ހާލު އެނގިވަޑައިގަންނަވާ ކަމަށް ވިދާޅުވިއެެވެ. އެހެންކަމުން، 18 އަހަރު ފުރުމާ އެކު، އަމިއްލަ ހައުސިން އެއް ލިބޭނެ ގޮތް ހައްދަވައިދެއްވާނެ ކަމަށް މުއިއްޒު ވިދާޅުވިއެވެ.
އަޅުގަނޑު ބޭނުން އެފޯޑަބަލް ހައުސިންއެއް ޒުވާނުންނަށް ފޯރުކޮށްދީގެން ލައިފް އެއް ބިލްޑު ކުރަން ފުރުސަތު ދޭން.
– މުއިއްޒު ވިދާޅުވިއެވެ.
މި އިވެންޓުގައި ބޭއްވި މުބާރާތްތަކުން ވަނަ ހޯދި ފަރާތްތަކަށް ވަނީ އިނާމު ދީފައެވެ. ފީފާ-23 އީގޭމް މުބާރާތުން އެއްވަނަ ހާސިލްކޮށްފައިވަނީ ހާއިސް ޙުސައިން ޙީލްމީއެވެ. ހާއިސް މި މަޤާމު ހޯދީ 31 ކުޅުންތެރިންނާއި ވާދަކޮށްގެންނެވެ. މި މުބާރާތުން އެއްވަނައަށް ދާ ކުޅުންތެރިއަކަށްވަނީ 15،000 ރުފިޔާގެ އިނާމެއް ހުށަހަޅާފައެވެ.
