ރިޔާސީ އިންތިހާބުގެ ދެވަނަ ބުރުގައި ވޯޓުލާ މީހުން ވޯޓުލީކަމުގެ ނިޝާން ވައަތުގެ މެދު އިނގިލީގައި ޖަހަން އިލެކްޝަން ކޮމިޝަނުން ކުރިން ނިންމި ނިންމުން ބަދަލުކޮށް، ވައަތުގެ ކަށި އިނގިލީގައި އެ ފާހަގަ ޖަހަން މިރޭ ނިންމައިފިއެވެ.
ވޯޓުލާންދާ މީހުންގެ އަތުގެ އިނގިލީގެ ނިޔަފައްޗާއެކު ޖަހާ މި ފާހަގަ އަކީ އެމީހާ ވޯޓުލާފައިވާކަން ޔަގީންކުރުމަށް ޖަހާ ފާހަނގަ އެކެވެ. މާކަރުން ޖަހާ މި ފާހަގަ އަކީ ގިނަ ދުވަސްތަކަށް ނުފިލާ ހުންނަ ފާހަގައަކަށްވާތީ ކައިރި ކައިރީގައި އިންތިހާބުތައް ބާއްވާއިރު ކޮންމެ އިންތިހާބަކަށް ފާހަގަ ޖަހާ އިނގިލި ބަދަލުކުރެއެވެ.
ރިޔާސީ އިންތިހާބުގެ ފުރަތަމަ ބުރުގައި މި ފާހަގަ ޖަހާފައިވަނީ ވޯޓު ލި މީހުންގެ ވައަތު ޝަހާދަތް އިނގިލީގައެވެ. ނަމަވެސް އިލެކްޝަންސް ކޮމިޝަނުން އިއުލާނުކޮށްގައިވާ ގޮތުގައި އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގައި މި ފާހަގަ ޖަހާނީ ވޯޓުލާން ދާ މީހާގެ ވައަތު މެދު އިނގިލީގައިކަމަށް މިއަދު ނިންމިއެވެ.
ނަމަވެސް، އެގޮތަށް ނިންމުމުން ބައެއް މީހުންގެ ފާޑުކިޔުން އަމާޒުވެފައި ވަނިކޮށް ކޮމިޝަނުން މިރޭ ބުނީ ވައަތުގެ މެދު އިނގިލީގެ ބަދަލުގައި ކަށި އިނގިލީގައި ފާހަގަ ޖެހުމަށް ނިންމާފައިވާ ކަމަށެވެ.
ދެވަނަ ބުރުގެ ވޯޓުލުން ކުރިއަށް ދާނީ ހޮނިހިރު ދުވަހުގެ ހެނދުނު 8:00 އިން ހަވީރު 5:00 އަށެވެ. އެއަށްފަހު ކުރިއަށް ދާނީ ވޯޓު ފޮށިތައް ގުނުމުގެ މަސައްކަތެވެ.
