ސިފައިންގެ ޑޮކްޔާޑަކާއި ބަނދަރެއް ހަދަމުން އަންނަ އުތުރު ތިލަފަޅޭ ކިޔައިގެން އިދިކޮޅު ޕީޕީއެމް/ޕީއެންސީން ދައްކަމުން އަންނަނީ ހޮޅި ވާހަކަތަކެއް ކަމަށާއި ދިވެހި ރައްޔިތުން އެކަން ގަބޫލު ނުކުރުމަށް ފޮރިން މިނިސްޓަރު އަބްދުﷲ ޝާހިދު މިއަދު ގޮވާލައްވައިފިއެވެ.
އަންނަ ހޮނިހިރު ދުވަހު އޮންނަ ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް ރައީސް އިބްރާހިމް މުހައްމަދު ސޯލިހް އައްޑޫ ސިޓީ އަށް މިހާރު ކުރައްވަމުން ގެންދަވާ ދަތުރުގައި މިއަދު ހެނދުނު ބޭއްވި ޖަގަހަ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ އައްޑޫ ރައްޔިތުންނަށް ފައިދާވާނެ ގޮތަކަށް ޕޮލިސް ޓްރެއިނިން ސެންޓަރެއް އަޅަން ފެށީމަ އިދިކޮޅު ފަރާތްތަކުން ދެއްކީ ފިތުނައިގެ ވާހަކަތަކެއް ކަމަށެވެ. އެކަމުގައި ވެސް ދެއްކީ "ހުސް ހޮޅި" ވާހަކަ ކަމަށް ޝާހިދު ވިދާޅުވިއެވެ.
"އެ ފިތުނައިގެ ވާހަކަ ދެއްކުމުގެ ބޭނުމަކަށްވީ މި ތަނުގައި އަޅަމުން ދިޔަ އިމާރާތް ހުއްޓުވާލައި އެތަނުގެ މަސައްކަތް ހުއްޓުވާލައި އެ ތަނުގައި މަސައްކަތް ކުރިޔަ ނުދިނުން. އޭގެ ގެއްލުން ވާނީ ކޮން ބަޔަކަށްތޯ؟ އައްޑޫގެ ރައްޔިތުންނަށް. އޭރު ދައްކަމުން ދިޔަ ވާހަކައަކީ މި ތަނުގައި އަޅަމުން ދިޔަ ޕޮލިސް އެކަޑަމީ އިމާރާތަކީ އިންޑިއާ ސިފައިން ތިބެން އަޅާ މަރުކަޒެކޭ. ދައްކައިގެން އުޑުގައި ޖެހިފައި، ބިމުގައި ޖެހިފައި ތެޅުނު ވަރު ބައްލަވާ." ޝާހިދު ވިދާޅުވިއެވެ.
ޝާހިދު ވިދާޅުވީ މިއަދު އެ އިމާރާތުގެ ބޭނުން ކުރަމުންދާ އިރު، އޭރު ނުކުމެ ވާހަކަ ދެއްކި އެކަކު ވެސް އެ ތަނުގައި އިންޑިއާ ސިފައިން ތިބި ކަމަށް ބުނަމުން ނުދާ ކަމަށެވެ.
"އެތަނުގައި ނެތޭ އިންޑިއާ ސިފައިންނެއް. އެ ތަނުގައި ނެތޭ އިންޑިއާ މީހުންނެއް. އެ ތަނުގައި ތިބީ އަޅުގަނޑުމެންގެ ފަހުރުވެރި ދިވެހި ސިފައިންނާއި ދިވެހި ފުލުހުންނާއި ދިވެހި ލޯ އެންފޯސްމަންޓް އޮފިސަރުން. އެމީހުންނަށް ތަމްރީން ދެމުން މިދަނީ." ޝާހިދު ވިދާޅުވިއެވެ.
ޝާހިދު ވިދާޅުވި ގޮތުގައި އުތުރު ތިލަފަޅޭ ކިޔައިގެން ހޮޅި ވާހަކަ ދައްކަނީ ދިވެހިންގެ ފަހުރުވެރި ސިފައިންނަށާއި ކޯސްޓްގާޑްގެ އުޅަނދުތަކުގައި ތިބި ފަޅުވެރިންނަށް އެކަށީގެންވާ ބަނދަރެއް ލިބިދާނެތީ އެކަމަށް ހުރަސް އަޅާށެވެ.
ރާއްޖެއަށް ޑްރަގް ވަދެދާނެ ދިމަދިމާ ކޯސްޑްގާޑުން ބަންދުކޮށް ހަދާފާނެތީ އިދިކޮޅުން އެކަމާ ތެޅި ބާލަނީ ކަމަށް ވެސް ޝާހިދު ވިދާޅުވިއެވެ. ރަނގަޅަށް ދުވާ އުނޅަދުތަކުގައި ނިކުމެ ޑްރަގް ވިޔަފާރިތައް ހުށްޓުވައިފިއްޔާ އޭގެ ގެއްލުވާނެ މީހުން މިއަދު ފިތުނަ ދޮލަގު ބޮލަށްލައިގެން ނިކުމެ އުޅެމުންދާ ކަމަށް ވެސް ޝާހިދު ވިދާޅުވިއެވެ.
ޝާހިދު ވިދާޅުވީ އައްޑޫއަށް އެކި ސަރުކާރުތަކުން އިހުމާލްވެފައިވާ ކަމަށެވެ. އަދި އެކަން އެ ސިޓީގެ ރައްޔިތުން ހަނދާން ހުންނާނެ ކަމަށް ޝާހިދު ވިދާޅުވިއެވެ. ރައީސް ސޯލިހްގެ ފަސް އަހަރުގެ ތެރޭގައި އައްޑޫ ހިމެނޭހެން ރާއްޖޭގެ އެކި ކަންކޮޅުތަކުގައި ގިނަ އަދަދެއްގެ މަޝްރޫތައް ކުރިއަށް ގެންގޮސްފައިވާ ކަމަށް ހުރިހާ ރައްޔިތުން ހެކިވާނެ ކަމަށް ޝާހިދު ވިދާޅުވިއެވެ.
"ޔާމީންގެ ޒަމާނުގައި މާލޭގައި ހިނގަމުންދިޔަ ފުޓްބޯޅަ މުބާރާތަކަށް ކަރަންޓު ބޭނުންވެގެން އައްޑޫގައި ހުރި ޖެނެރޭޓަރު އުފުރާލައިގެން ގެންދިޔަ ހަނދާން ހުންނާނެ. ޔާމީންގެ ފަސްް އަހަރުގެ ތެރެގައި މުއިއްޒު ހައުސިން މިނިސްޓަރަކަށް ހުންނަވައިގެން އައްޑޫގައި ބޭއްވި އެންމެ ގާބުރި އެއް ދައްކަންކެރޭ އައްޑޫގެ ރައްޔިތަކު ނުހުންނާނެ. މުއިއްޒު ވެރިކަމަށް އަތުވެއްޖެނަމަ އައްޑޫ ބާކީ ކޮށްލާނެ ކަމާމެދު ޝައްކެއްނެތް." ޝާހިދު ވިދާޅުވިއެވެ.
