ސަރުކާރުގެ "ބިންވެރިޔާ" ސްކީމްގެ ދަށުން މާލެ ސަރަހައްދުން ގޯތި ލިބުނު މީހުންނަށް ނޮވެމްބަރު 5 ގެ ކުރިން ރަޖިސްޓްރީ ހަވާލުކުރާނެ ކަމަށް ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެއެވެ.
މާލޭގެ ޗާންދަނީ މަގުގައި މިރޭ ބޭއްވި ކެމްޕެއިން ޖަލްސާއެއްގައި ވާހަކަފުޅު ދައްކަވަމުން ރައީސް ވިދާޅުވީ ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކުން އެކުލަވާލާފައިވާ އެކި ކޮމިޓީތަކާ ބައްދަލުކުރެއްވި ކަމަށެވެ. އެއިން ކޮންމެ ބައެއްގެ ވެސް ޝައްކުތަކެއް ހުރި ކަމަށާއި ޔަގީންކަން ހޯދަން ބޭއްވި ކަންތައްތަކެއް ހުރި ކަމަށް ރައީސް ވިދާޅުވިއެވެ.
ރައީސް ވިދާޅުވީ ގޯތީގެ ރަޖިސްޓްރީ ނުލިބޭތީ، އެ ރަޖިސްޓްރީ ދޭނެ ކަމުގެ ޔަގީން ކަން އެމީހުން ބޭނުންވާ ކަމަށެވެ.
"އެއް ކަމަކަށް އެބޭފުޅުންގެ ފަރާތުން އެދުނީ ކިހާ ޔަގީންކަމެއް އެބައޮތްތޯ މި ސަރުކާރު ނިމުމުގެ ކުރިން ގޯތު ދޫކޮށް ރަޖިސްޓްރީ ލިބޭނެ ކަމުގެ. ޔަގީންކަން މި އަރުވަނީ މި ދައުރު ނިމުމުގެ ކުރިން، ފަހެއް ނޮވެމްބަރު ވާން ވާއިރަށް ވައުދުވެފައިވާ އޮތް ގޮތައް ރަޖިސްޓްރީ ހަދާ ގޯތީގެ އިން ވަކިކޮށްފައި ހަވާލުކޮށްދޭނަން. އެ ރަޖިސްޓްރީ ވާނީ ގާނޫނީ ހުރިހާ ހަމައެއް ހަމަވާ ލިޔުމަކަށް." ރައީސް ވިދާޅުވިއެވެ.
ގިރާވަރު ފަޅުން ގޯތި ލިބުނު ފަރާތްތަކުން ވެސް އޮޅުން ފިލުވަން ބޭނުން ކަންތައްތަކެއް ހުށަހެޅި ކަމަށާއި އެ ފަޅަކީ ހިއްކަމުންދާ ތަނަކަށްވާތީ އެތަން ހިއްކާ ބިމުން އިން ވަކިކޮށް އެ ފަރާތްތަކަށް ގޯތި ހަވާލުކުރާނެތޯ ޔަގީންކޮށްދިނުމަށް އެދުނު ކަމަށް ވެސް ރައީސް ވިދާޅުވިއެވެ.
އަމާޒަކީ ފަހެއް ނޮވެމްބަރު ވާއިރު ގިރާވަރު ފަޅު ވެސް ހިއްކާ އެތަނުން އިން ވަކިކޮށް ގޯތި ހަވާލުކުރުން ކަމަށް ރައީސް ވިދާޅުވިއެވެ. އެތަނުގައި ބޭނުންވާ ފެނާ ނަރުދަމާ އާއި ކަރަންޓާއި މަގު ހެދުމުގެ މަސައްކަތް އެތަން ހިއްކުމުގެ މަސައްކަތް ނިމުމާއިއެކުގައި ފަށާނެ ކަމަށާއި އެތަންތަނުގައި އިމާރާތް ކޮށް ނިމެންވާއިރަށް، އެންމެ ގިނަވެގެން ދެ އަހަރު ދުވަހުގެ ތެރޭގައި އެ ހުރިހާ ތަނެއްގައި އެ ވަސީލަތްތައް ގާއިމްކޮށްދެއްވާނެ ކަމަށް ވިދާޅުވިއެވެ.
މީގެއިތުރުން ހުޅުމާލޭގައި މެކްސިމައިޒްކޮށް ބިން ބޭނުން ކުރެވޭ ގޮތަށް މިހާރު އޮތް އުސޫލު ބަދަލުކޮށް ހުޅުމާލޭގެ ގޯތިތައް 10 ބުރިއަށް ހެދުމުގެ ފުރުސަތު ފަހިކޮށްދެއްވާނެ ކަމަށް ވެސް ރައީސް ވިދާޅުވިއެވެ.
