އެމްޑީޕީ ރޫޅާލަން ކިތަންމެ މަސައްކަތް ކުރި ނަމަވެސް އެކަން ކުރި މީހުން ތިބީ ހަފޮޅުން ބޭރު ވެފައި ކަމަށާއި، އެމްޑީޕީ އަބަދުވެސް ދެމި އޮންނާނެކަމަށް އެޕާޓީގެ ކުރީގެ ޗެއާޕާސަން މޫސާ މަނިކު ވިދާޅުވެއްޖެއެވެ.
އޭނާ މިހެން ވިދާޅުވީ ޑިމޮމްރެޓްސްގެ މެމްބަރުންނާއި ގުޅޭގޮތުން ބިލެއްދޫ ދާއިރާގެ މެމްބަރު އަހުމަދު ޚަލީފް ދެއްކެވި ވާހަކަތަކަށް ހަސަން ލަތީފް ދެއްވި ރައްދާއި ގުޅިގެން ކުރެއްވި ޓުވީޓެއްގައެވެ. ދޮންބިލޭ ވަނީ ޕީޕީއެމްގެ މަކަރާއި ހީލަތުގައި އެމްޑީޕީއާއި ޑިމޮކްރެޓްސްގެ މެންބަރުން ނުޖެހޭނެ ކަމަށާއި މިއަދު އެންމެން އެއް ރޫހެއްގައި މި ނިކުންނަނީ އަމާން އަދި އުފާވެރި ރާއްޖެއަކަށް ދިއުމަށް ކަމަށެވެ.
ނަމަވެސް ހަސަން ވިދާޅުވެފައިވަނީ ޑިމޮކްރެޓްސްގެ މެމްބަރުންނަކީ ފަޅަކަށް ވީިކޭނެ ބައެއް ނޫންކަމަށެވެ. އެއައަށްވުރެ މާވަރުގަދަ ރޫހެއްގައި މަސައްކަތް ކުރާ ބައެއް ކަމަށެވެ. ހަސަންގެ ވާހަކަތަކާއި ގުޅިގެން ރައީސް ނަޝީދާއި އަބަދުވެސް ވާދަވެރިކަން އޮންނަ މޫސަ ވިދާޅުވި ހަސަން ލަތީފް މެންނަކީ އެމްޑީޕީ ހަލާކުކޮށްލުމުގެ ރޫހުގައި އެމްޑީޕީއާއި ގުޅުނު މެމްބަރުން ކަމަށެވެ. އަދި މިހާރުވެސް އެމްޑީޕީއާއި ފެޔަށް ޖެހިގެންވެސް ކުރަނީ އެމަސައްކަތް ކަމަށެވެ.
ނަމަވެސް އެމްޑީޕީ ރޫޅާލަން ކުރާ މަސައްކަތަކީ ކުރެވޭނެ ކަމެއް ނޫންކަމަށާއި، އެމްޑީޕީ ދެމި އޮންނާނެކަމަށެވެ. ހަސަނާއި އެނޫންވެސް ބޭފުޅުން މިހާރު ތިއްބެވީ ހަފޮޅުން ބޭރު ވެފައިކަމަށާއި، ރަނގަޅު ގޮތަކީ އެނބުރި އެމްޑީޕީއާއި ގުޅުންކަމަށް މޫސަ ވިދާޅުވިއެވެ.
އެމްޑީޕީ ހަލާކުކޮށް ލުމުގެ މަގުސަދާ ހަސަން ލަތީފްމެން މިޕާޓީއަށް ވަދެ އަންނިގެ މާއަރިސް ބަޔަކަށްވެ ތިބެ އަޅުގަނޑުމެން ބާކީ ކުރީ. އެމްޑީޕީގެ އެންމެ އުސް ސަފަށް އެރުނީމަވެސް ޕާޓީ ރޫޅާ މަގުސަދު ހާސިލް ނުވި ނޫންތޯ؟ މިއަދު ތިތިބީ ހަފޮޅުން ބޭރުވެފަ. އެމްޑީޕީ އަބަދުވެސް އޮންނާނެ، ދެންވެސް އެނބުރި އާދޭ.
– މޫސަ ވިދާޅުވިއެވެ.
ރިޔާސީ އިންތިޚާބުގެ ދެވަނަ ބުރުގެ ވޯޓުލުން 30 ވަނަ ދުވަހު އޮންނައިރު، ޑިމޮކްރެޓްސް އިން ވަނީ ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރަން ނިންމާފައެވެ. މިއާއިއެކު އެޕާޓީގެ ޢާންމު ގިނަ މެމްބަރުން ދަނީ ރައީސް ޞާލިހުގެ ވެރިކަން ބަދަލު ކުރުމަށް މަސައްކަތް ފަށާ، ޑރ. މުއިއްޒު އިންތިޚާބު ކުރުމަށް ބައިއަތު ހިފާފައެވެ. އަދި ބައެއް ރަށްރަށުގައި މިހާރު ޑިމޮކްރެޓްސް އާއި ޕީޕީއެމް މެމްބަރުން ގެންދަނީ އެކީގައި މަސައްކަތް ކުރަމުންކަން ފާހަގަ ކޮށްލެވެއެވެ.
