ރައްޔިތުންގެ މަޖިލިހުގެ މިއަދުގެ ޖަލްސާއަށްވެސް ހާޒިރުވި މެމްބަރުންގެ އަދަދު މަދުވެގެން މިއަދުގެ މަޖިލިސް ޖަލްސާވެސް ފެށުން ލަސްވެއްޖެއެވެ.
ރައްޔިތުންގެ މަޖިލިހުގައި 87 މެމްބަރުން ތިއްބަވާއިރު، ޖަލްސާ ފެށުމަށްޓަކާ 22 މެމްބަރުންގެ ކޯރަމް ހަމަވާން ޖެހެއެވެ. އެހެންނަމަވެސް މިއަދުގެ ޖަލްސާ ފަށާގަޑި ޖެހުނުއިރު ހާޒިރުވެ ތިބީ 18 މެމްބަރުންނެވެ.
މިއަދު 9:00 ގައިވެސް މަޖިލިސް ފެށުމަށް މަޖިލިސް ރައީސް މުހައްމަދު ނަޝީދު ރިޔާސަތަށް ވަޑައިގެންފައި ވެއެވެ. އަދި ވިދާޅުވީ މިއަދު ކުރިޔަށް ގެންދަވާނީ މަޖިލިސް މުޅި ކޮމިޓީއަކަށް ބަދަލު ކޮށްގެން ކަމުގައެވެ.
އެއީ ރާއްޖޭގެ ވެރިކަމުގެ ނިޒާމު ބަދަލު ކުރުމަށް ހުޅުދޫ ދާއިރާގެ މެމްބަރު އިލްޔާސް ލަބީބު ހުށަހަޅުއްވާފައިވާ މައްސަލަ މަޖިލިސް މުޅި ކޮމިޓީއަށް ފޮނުވުމަށް އިއްޔެގެ ޖަލްސާއިން ފާސްކޮށްފައި ވާތީއެވެ.
އެހެންނަމަވެސް މަޖިލިސް ޖަލްސާ ފެށުމަށް ސިޔާސީ ޕާޓީތަކުގެ މެދުގައި މަޝްވަރާ ކުރިޔަށްދާތީ، ހާޒިރުވި މެމްބަރުން ތަޅުމުގައި ތިބުމަށް ނަޝީދު އެދިވަޑައިގެންފައި ވެއެވެ.
ކޮމިޓީގައި ތިއްބެވުން ވަރަށް ބޮޑަށް އެދެން އެއީ ސިޔާސީ ޕާޓީތަކުގެ މަޝްވަރާކުރެވެމުން ދަނީ. އަޅުގަނޑު ހިތުން އެމްޑީޕީގެ ޕާލަމެންޓްރީ ގްރޫޕްގެ ލީޑަރުންނާއި ޕީޕީއެމް/ޕީއެންސީގެ ލީޑަރުންނާއި ޑިމޮކްރެޓުންގެ ލީޑަރުން ދަނީ މަޝްވަރާކުރަމުން. މަޝްވަރާކުރަމުން މިދަނީ މަޖިލީހަށް ބޭފުޅުން ވަޑައިގަންނަވާނެތޯ ނުވަތަ ނޫންތޯ، އެކަމާ ގުޅޭ ގޮތުން.
މަޖިލިސް ޖަލްސާގެ ކޯރަމް ހަމަކުރުމަށް މަސައްކަތް ކުރެވެމުންދާކަމަށް ވިދާޅުވަމުން ނަޝީދު ވިދާޅުވިއެވެ.
ރައްޔިތުންގެ މަޖިލިސް ހުއްޓުވަމުންދަނީ ރައީސް ސާލިހު އިސްވ ހުންނަވައިގެން ކަމަށް މަޖިލިސް ރައީސް މުހައްމަދު ނަޝީދު ވަނީ ތުހުމަތު ކުރައްވާފައެވެ. އެހެންނަމަވެސް ރައީސް ސާލިހު ވިދާޅުވެފައިވަނީ މަޖިލިސް ހުއްޓުވުމަށް އެމަނިކުފާނު އެއްވެސް މަސައްކަތެއް ކުރައްވާފައި ނުވާނެ ކަމުގައެވެ.
