ށ. ގޮއިދޫ އެމްޑީޕީގެ އިސް ބޭފުޅުން ތަކެއް ހިމެނޭހެން ގިނަ ބަޔަކު ރިޔާސީ އިންތިޚާބުގެ ދެވަނަ ބުރުގައި ޑރ. މުއިއްޒަށް ތާއީދުކޮށް ޕީޕީއެމްއަށް ސޮއިކޮށްފިއެވެ.
ރިޔާސީ އިންތިޚާބުގެ ދެވަނަ ބުރުގައި ޑރ. މުއިއްޒު ށ. ގޮއިދޫއަށް ވަޑައިގެންނެވުމުން އެރަށުން ވަނީ ހޫނު މަރުޚަބާއެއް ކިޔާފައެވެ. ފުރަތަމަ ބުރުގައި ގޮއިދޫ ރައްޔިތުން ވަނީ މުއިއްޒަށް އެރަށުން ބޮޑު ތާއީދެއް ދެއްވާފައެވެ. މުއިއްޒު މިއަދު އެރަށަށް ވަޑައިގެންނެވުމުން ގޮއިދޫގެ ރައްޔިތުން ވަނީ ދެވަނަ ބުރުގައިވެސް ބޮޑު ތަފާތަކުން މުއިއްޒު އަށް އެރަށުން މެޖޯރިޓީ ހޯއްދަވާ ދެއްވާނެ ކަމުގެ ޔަގީންކަން ދެއްވާފައެވެ.
މުއިއްޒަށް ތާއީދުކޮށް، މިއަދު ގޮއިދޫއިން ގުޅުނު މީހުންގެ ތެރޭގައި އެރަށުގެ އެމްޑީޕީގެ އެންމެ ދުވަސްވީ މެމްބަރުންނާއި، ޕާޓީތަކަށް ނިސްބަތް ނުވާ މެމްބަރުން ހިމެނެއެވެ.
މުއިއްޒު ވަނީ ދެވަނަ ބުރުގައި ފުރަތަމަ ބުރުގައި ލިބުނު ވޯޓަށްވުރެ ވޯޓު އިތުރުކޮށް އިންތިޚާބުގެ ތަފާތު ބޮޑުކުރަން ރައްޔިތުންގެ ކިބައި އެދިފައެވެ. އަދި ގޮއިދޫ ރައްޔިތުން އެދޭ ހަލުވި ސްޕީޑު ރަށަށް ގެނެވޭނީ ތަރައްޤީއަށް ފަރިތަ ފިކުރަށް ޖާގަ ދީގެން ކަމަށް މުއިއްޒު ވިދާޅުވިއެވެ.
