ރިޔާސީ އިންތިހާބުގެ ދެވަނަ ބުރުގެ ކުރިން ރާއްޖޭގައި ވެރިކަން ކުރާނެ ނިޒާމަކާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓަކަށް ދިޔުމަށް އެމްޑީޕީ އާއި ޕީޕީއެމް އަށް ހުށަހަޅާފައިވާ ކަމަށާއި ނަމަވެސް އެއްވެސް އެއްބަސްވުމެއްގައި ސޮއި ކުރަން ޕީޕީއެމް އިން ބޭނުން ނުވާ ކަމަށް ދަ ޑިމޮކްރެޓްސް އިން ބުނެފިއެވެ.
ހ.މައިޒާންދޮށުގޭ ގައި މިރޭ ބޭއްވި މީޑިއާ ބްރީފިންއެއްގައި ދަ ޑިމޮކްރެޓްސްގެ ވަގުތީ ޗެއާޕާސަން ހަސަން ލަތީފު ވިދާޅުވީ އެއްވެސް ކަމަކާ އެއްބަސްވެ، ސޮއިކޮށްގެން ކުރިއަށް ދާން ޕީޕީއެމުން އެއްބަސްނުވާ ކަމަށާއި އެހެންވެ، އެ މަޝްވަރާތައް މިހާރު ކުރިއަށް ނުދާ ކަމަށެވެ.
އެހެންވީމާ އަޅުގަނޑުމެންނަށް ވަރަށް ދަތި އެއްޗެއްގައި ސޮއިނުކޮށް، ޕީޕީއެމްއާ އެކީ ޑިމޮކްރެޓުންނަށް މަސައްކަތެއް ކުރަން. އެނގިވަޑައިގަންނަވާނެ ސިޔާސީ ޕާޓީއެއް ޑިމޮކްރެޓްސް އަކީ ވެސް. ޕާޓީގައި އޮންނަން ޖެހޭނެ، ޕާޓީން އެއްބަސްވާ ކަންކަން ލިއުމުން ފެންނަން.
– ހަސަން ވިދާޅުވިއެވެ.
ހަސަން ވިދާޅުވި ގޮތުގައި ޕީޕީއެމްއަށާއި އެމްޑީޕީއަށް ވެސް ވެސް ޑިމޮކްރެޓުން ހުށަހެޅި ހުށަހެޅުމަކީ ރާއްޖޭގައި ވެރިކަންކުރުމުގެ ނިޒާމު އަލުން ކަނޑައެޅުމާއި މެދު ފެންނަ ނުފެންނަ ވޯޓެއް ނެގުމުގެ ހުށަހެޅުމެވެ.
އަޅުގަނޑުމެން މިހުށަހަޅާ ގޮތަކީ ސެޕްޓެމްބަރު 25 ގައި، އެއީ ދެވަނަ ބުރުގެ ކުރިއަށް ނިޒާމީ ވޯޓެއް ނަގަން، އެއީ ފެންނަ ނުފެންނަ ވޯޓެއް ނަގަން.
– ހަސަން ވިދާޅުވިއެވެ.
ޑިމޮކްރެޓްސްގެ ހުށަހެޅުންތަކަށް އެމްޑީޕީގެ ފަރާތުން އަދި ވަކި ޖަވާބެއް ނުލިބޭ ކަމަށް ހަސަން ލަތީފް ވިދާޅުވި އެވެ. އެހެން ނަމަވެސް މަޝްވަރާތައް އަދިވެސް ކުރިޔަށް ދާ ކަމަށް އޭނާ ވިދާޅުވިއެވެ. ހަސަން ލަތީފް ވިދާޅުވީ ރިޔާސީ އިންތިހާބުގެ ފުރުތަމަ ބުރުން ރައީސް އިބްރާހިމް މުހައްމަދު ސޯލިހު ނާކާމިޔާބު ވެއްޖެ ކަމަށެވެ. އެހެންވެ އެމަނިކުފާނަށް ދެން ވެސް ގާނޫނުއަސާސީގެ ތެރެއިން ކުރެވެން ހުރި ކަންކަން ކޮށްގެން ފެންނަ ނުފެންނަ ވޯޓެއް ނެގުމަށް މަސައްކަތް ކުރެވޭނެ ކަމަށް ހަސަން ލަތީފް ވިދާޅުވިއެވެ.
