ދިވެހި ރައްޔިތަކަށް ލިބޭ ކޮންމެ ހައްގެއް ސަލަފްގެ މެމްބަރުންނަށްވެސް ލިބެންޖެހޭ ކަމަށާއި، ވަކި ޖަމްއިއްޔާއަކަށްވީތީ އެ ޖަމްއިއްޔާއަށް ނިސްބަތްވާ ދިވެހި ރައްޔިތުންނަށް އެއްވެސް ތަފާތެއް ނުކުރެވޭނެކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓަރ) ވިދާޅުވެއްޖެއެވެ.

ރިޔާސީ އިންތިޚާބުގައި އެމްޑީޕީއަށް ނިސްބަތްވާ އިސްބޭފުޅުން ސަލަމް ޖަމްއިއްޔާއަށް ނިސްބަތްވާ ޢިލްމުވެރިންނާއި ޢާންމު މެމްބަރުންނާއި ގުޅޭގޮތުން ދައްކަމުންދާ ވާހަތަކަށް މިއަދު މަޖިލީހުގައި ރައްދު ދެއްވަމުން މޮސްޓަރ ވިދާޅުވީ ސަލަފް ޖަމްއިއްޔާގައިވެސް ސައްތައިން ސައްތަ މުސްލިމު ދިވެހި ރައްޔިތުން ކަމަށެވެ. އޭނާ ވިދާޅުވީ ސަލަފް ޖަމިއްޔާއަކީ ޓެރަރިސްޓް އަދި ކުށްވެރިންގެ ގޮތުގައި ރާއްޖޭގެ އެއްވެސް ގާނޫނަކުން ކަނޑައަޅާފައިނުވާ ކަމަށެވެ.

ޑރ. މުޢިއްޒުގެ ވެރިކަމެއްގައި ސަލަފް ޖަމިއްޔާގެ ބޭފުޅަކަށް އިސްލާމިކް މިނިސްޓަރުގެ މަގާމުދީފަ ކަމުގައިވާނަމަ އެކަމުން ނިކުމެދާނެ ގެއްލުމަކީ ކޮބައިތޯ ސުވާލު ކުރައްވާފައެވެ. އަދި ދިވެހި ކޮންމެ ރައްޔިތަކަށް ލިބިދޭ ހައްގުތަށް ސަލަފުގެ މެމްބަރުންނަށްވެސް ލިބެންޖެހޭކަމަށް މޮސްޓަރ ވިދާޅުވިއެވެ.

ދިވެހި ރައްޔިތެއްގެ ހައިސިއްޔަތުން ދިވެހި ރައްޔިތަކަށް ލިބިދޭ ކޮންމެ ހައްގެއް ސަލަފުގަ އިންނަ ކޮންމެ މެމްބަރަކަށްވެސް ލިބިގެންވާނެ. ހަމަ އެހެން ދިވެހި ރައްޔިތުން ދައްކާހެން އެމީހުންވެސް ޓެކްސް ފައިސާއިން ޓެކްސް ދައްކާނެ. އެމީހުންނަށް ލިބެންޖެހޭ ހައްގެއް އެމީހުންނަށްވެސް ލިބެންޖެހޭނެ. ވޯޓު ކަރުދާހުގައި ފާހަގަ ލިބެންވެސް ޖެހޭނެ. ބާރުވެރި މަޤާމުތަކަށް އަންނަން ޖެހޭނީ ވަކި ބަޔަކަށް ނިސްބަތްވާތީ ވަކި ބަޔަކަށް ވާތީ، ވަކި ހެދުމެއް ލާތީ އެއުސޫލެއް ނޫން މިތާ އޮންނަން ޖެހޭނީ.

– މޮސްޓަރ ވިދާޅުވިއެވެ.

މޮސްޓަރ ވިދާޅުވީ ސިޔާސީ ކަންކަމުގެ ތެރެއަށް ސަލަފް ޖަމިއްޔާގެ ބޭފުޅުން ވަދެގެން ނޫޅޭކަމަށެވެ. އެމީހުންނަކީ ދީނީ އިލްމު އުގަންނާ ދެއްވައި ދީނީ މައުލޫމާތު ރައްޔިތުންނަށް ދެއްވާ ދިވެހި އެތައް ރައްޔިތުންގެ ލޯބޮ ލިބިފައިވާ އިލްމުވެރިންތަކެއް ހިމެނޭ ޖަމްއިއްޔައެއްކަމަށް އޭނާ ވިދާޅުވިއެވެ. އެނޫންވެސް އެހެންވެސް ދީނީ ކަންކަމުގައި ހަރަކާތްތެތެރިވާ ޖަމްއިއްޔާ ޖަމާއަތްތަކަކީ ހަރުކަށި ބައެއް ކަމަށް ވާހަކަ ދައްކައި ސިޔާސީ މަންފާ ހާސިލް ކުރަން އުޅުމަކީ ގޯސް ކަމެއްކަމަށް މޮސްޓަރ ވިދާޅުވިއެވެ.

ދިވެހި ރާއްޖޭގައި އިސްލާމްދީން އޮވެދާނެތީތޯ މިމީހުން މިހާ ބިރުން މިއުޅެނީ. ހަމަ ކޮންމެ ދުވަހަކު އަބަދާއި އަބަދު ސަލަފު. ސަލަފު. އެނޫން ނަމެއް ނެތީތޯ ދުލު ކުރީގަ. އެނޫންބައެއް ނެތޯތޯ މިތާ މިވާހަކަ ދައްކަން. އަބަދާއި އަބަދު އެއަކުން ނެއްޓެން ބޭނުން ނުވެގެން މިއުޅެނީ ކީއްވެތޯ.

– މޮސްޓަރ ވިދާޅުވިއެވެ.

ރިޔާސީ ކެމްޕޭންގައި ރައީސް ޞާލިހުގެ ތަރުޖަމާން މާރިޔާގެ އެންމެ ބޮޑު ފޯކަސް އެއް އޮތީ ސަލަފް ޖަމްއިއްޔާއަށެވެ. މާރިޔާ ވަނީ ޑރ.މުއިއްޒާއި އަނބިކަބަލުންނާއި ގުޅޭގޮތުން ދޮގު އެތައް ވާހަކަތަކެއް ދައްކައި ހަރުކށި ފިކުރުތަކާއި ގުޅުވުމަށް އެކި ތުހުމަތުތައް ކުރައްވާފައެވެ.