ވިސްނިފައި ނެތް ބައެއް ކަންކަން އެބަހުރިކަމަށާއި، އެހެން ބަޔަކާ ގުޅުމަށް މަސައްކަތްކުރައްވާކަމަށް އެމްޑީޕީގެ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އިންތިޚާބުގެ ވަގުތީ ނަތީޖާއިން ދައްކާގޮތުގައި ރައީސް ޞާލިޙަށް ލިބިވަޑައިގަތީ ދެވަނައެވެ. އެންމެ ގިނައިން ވޯޓު ހޯއްދެވީ ޑރ.މުޙައްމަދު މުޢިއްޒުއެވެ.
ރައީސް ޞާލިޙްގެ ރަސްމީ ކެމްޕޭން އޮފީސް ހުންނަ ސޯލްޓް ކެފޭ އިމާރާތުން ނުކުމެވަޑައިގެންނެވި ވަގުތު ނޫސްވެރިން ކުރެއްވި ސުވާލުތަކަށް ޖަވާބުދެއްވަމުން ރައީސް ވިދާޅުވީ އިންތިހާބުގެ 2 ވަނަ ބުރަށް ތައްޔާރުވުމުގެ މަސައްކަތް އަނެއްކާވެސް ޕްލޭންކޮށްގެން ފަށްޓަވާނެކަމަށެވެ. މިއީ އުންމީދު ކުރެއްވި ނަތީޖާތޯ ސުވާލުކުރެއްވުމުން ރައީސް ވިދާޅުވީ، ވިސްނިފައި ނެތް ބައެއް ކަންތައްތައް އެބަހުރިކަމަށެވެ. އެކަންކަމަށް 2 ވަނަ ބުރަކަށް ތައްޔާރުވާއިރު ވިސްނާވަޑައިގަންނަވާނެކަމަށް ރައީސް ވިދާޅުވިއެވެ.
2 ވަނަ ބުރެއްގައި ރައީސް ނަޝީދާއި ގުޅިވަޑައިގަންނަވާނަންތޯ ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ރައީސް ވިދާޅުވީ، ބަޔަކާއި ގުޅިވަޑައިގަންނަވަން ޖެހޭނެކަމަށެވެ.
"އަޅުގަނޑުމެންނަށް ކޮންމެ ގޮތެއްވިއަސް ބަޔަކާއި އެކީގައި ބައިވެރިވާންޖެހޭނެ. އަޅުގަނޑު ހިތުން ޕީޕީއެމްވެސް (ބަޔަކާއި ގުޅުމަށް) މަސައްކަތް ކުރާނެ. އަޅުގަނޑުމެންވެސް ކުރާނެ." ރައީސް ވިދާޅުވިއެވެ.
އިންތިހާބުގެ ވަގުތީ ނަތީޖާ ދައްކާގޮތުން ރައީސް އިބްރާހިމް މުހައްމަދު ޞާލިހްއަށް ލިބިވަޑައިގަތީ 39.09 އިންސައްތަ ވޯޓެވެ. އެއީ 85900 އެއްހައި ވޯޓެެވެ.
