ރިޔާސީ އިންތިޚާބުގެ ވޯޓުލުން ކުރިއަށްދިޔަ އއ. ރަސްދޫގައި ބެހެއްޓި ވޯޓު ފޮށީގައި މަސައްކަތް ކުރަމުން ދިޔަ، ކޮމިޝަނުގެ ދެ އޮފިޝަލަކު އެކަހެރި ކުރުމާ ގުޅިގެން އެ ސަރަހައްދުގައި ހަމަނުޖެހުން ހިންގައިފިއެވެ.
ރަސްދޫ ކައުންސިލުގެ ރައީސް، މުހައްމަދު ނާހިދު ވިދާޅުވީ އެސަރަހައްދުގައި ހިނގި ހަމަނުޖެހުންތައް މިހާރު ނިމުމަކަށް އައިސްފައިވާ ކަމަށެވެ. ނަމަވެސް އެކަމާ ގުޅިގެން އަދިވެސް ވޯޓުލުން މަޑުޖެހިފައިވާ ކަމަށް ވިދާޅުވިއެވެ.
އިލެކްޝަންސް ކޮމިޝަނުގެ ސެކްރެޓަރީ ޖެނެރަލް އިސްމާއީލް ޒަކަރިއްޔާ ވިދާޅުވީ އެ ސަރަހައްދުގައި ހަމަނުޖެހުން ހިނގި ނަމަވެސް، ވޯޓުލުން ހުއްޓާލާފައި ނުވާ ކަމަށެވެ. އޭނާ ވިދާޅުވީ އެ އޮފިޝަލުން ދުރުކުރަން ޖެހުނީ ކެމްޕޭނު ހަރަކާތެއްގައި ބައިވެރިވުމާ ގުޅިގެން، ހުށަހެޅި ސުލޫކީ މައްސަލައެއް ބަލައި، އެކަން ސާބިތުވުމުން ކަމަށެވެ. ވޯޓު ފޮށިތަކުގެ ކައިރީ ތިބޭ އޮފިޝަލުން އެއްވެސް ސިޔާސީ ހަރަކާތެއްގައި ބައިވެރިވުމަކީ އުސޫލާ ޚިލާފު ކަމެކެވެ.
ކައުންސިލް ރައީސް ވިިދާޅުވި ގޮތުގައި ވޯޓުލާ މަރުކަޒު ކައިރިއަށް އެއްވީ އިދިކޮޅު ޕީޕީއެމް، ޕީއެންސީގެ ސަޕޯޓަރުންނެވެ. މައުލޫމާތު ލިބިފައިވާ ގޮތުގައި އެކަހެރި ކުރި ދެ އޮފިޝަލުންނަކީ ޕީޕީއެމް/ޕީއެންސީއަށް ނިސްބަތްވާ ދެ އޮފިޝަލުންނެވެ.
