މިފަހަރުގެ ރިޔާސީ އިންތިޚާބުގައި ކުރިމަތި ލައްވާފައިވާ ކެންޑިޑޭޓުންގެ ތެރެއިން ވެރިކަމަށް އެންމެ ޤާބިލް ކެންޑިޑޭޓަކީ ޑރ. މުއިއްޒު ކަމަށާއި މުއިއްޒު ނޫން ބޭފުޅަކަށް މިފަހަރު ތާއީދު ނުކުރައްވާނެކަމަށް ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ޢަލީ ޒައިދު މިހެން ވިދާޅުވީ އޭނާ މުއިއްޒަށް ތާއީދު ކުރަން ނިންމުން އަމާޒުވާ ފާޑުކިޔުންތަކާއި ގުޅިގެން ހަތަރު އިނގިލި ދައްކާލުމަށްފަހު މިއަދު ކުރެއްވި ޓުވީޓުގައެވެ. ޒައިދު ވިދާޅުވީ މުހިންމީ ޟަމީރު ޤަބޫލުކުރާ ހަމަތަކާއި އުޞޫލުތަކުގެ މަތީގައި، އެންމެ ރަނގަޅު ކެނޑިޑޭޓެއް އިޚްތިޔާރުކުރުން ކަމަށެވެ. ހުރިހާ ގޮތަކުން ބަލާއިރުވެސް މިފަހަރުގެ އިންތިޚާބުގައި ވާދަކުރައްވާ އެންމެ ޤާބިލް ކެންޑިޑޭޓަކީ ޑރ. މުއިއްޒުކަމަށް ޒައިދު ވިދާޅުވިއެވެ.
އަޅުގަނޑަކަށް މޮޅުވާކޮޅެއް/ދެރަވާކޮޅެއް މުހިންމެއްނޫން! މުހިންމީ ޟަމީރު ޤަބޫލުކުރާ ހަމަތަކާއި އުޞޫލުތަކުގެ މަތީގައި، އެންމެ ރަނގަޅު ކެނޑިޑޭޓެއް އިޚްތިޔާރުކުރުން! މޮޅުވިޔަސް އަދި ބަލިވިޔަސް މިފަހަރު އަޅުގަނޑުގެ ޗޮއިސްއަކީ ޑރ. މުއިއްޒު. މީ ވަރަށް ސާފުކަމެއް!
– ޝައިޚު އަލީ ޒައިދު ވިދާޅުވިއެވެ.
ޝެއިހް ޒައިދު ޑރ. މުއިއްޒަށް ތާއިދު ކުރައްވަން ނިންމެވިއިރު، އިއްޔެ ދީނީ އިލްމުވެރިންގެ ތެރެއިން 100 އިލްމުވެރިއަކު ވަނީ ޑރ.މުއިއްޒަށް ތާއީދު ކުރައްވާކަން ހާމަ ކުރައްވާފައެވެ. ޒައިދުގެ އިތުރުން ގިނަ އަދަދެއްގެ ދީނީ އިލްމުވެރިންގެ ޖަމިއްޔާއެއްް ކަމަށްވާ އިލްމުވެރިންގެ ގުޅުމުގެ ގިނަ އަދަދެއްގެ ފަރާތްތައްވެސް ތާއިދު ކުރައްވަނީ ޑރ. މުއިއްޒުއަށް ކަން ފާހަގަކޮށްލެވެއެވެ.
