މީސްމީޑިއާ މީޑިއާ އިންފުލުއެންޒާ ފާތިމަތު ޒަޔަން، (ކައިޒީން) އެމްޑީޕީއަށް ސޮއިކޮށް، ރައީސް އިބްރާހިމް މުހައްމަދު ސޯލިހަށް ރިޔާސީ އިންތިހާބުގައި ތާއިދު ކުރަން ނިންމައިފިއެވެ.
ކައިޒީން އެމްޑީޕީއާ ގުޅުމަށްފަހު އޭނާގެ ފޯމު ވަނީ ރައީސް ސޯލިހަށް އަރުވާފައެވެ. ނިވާކަން ކުޑަ ފޮޓޯތަކާއި ވީޑިއޯތައް އާއްމު ކުރާތީ ގިނަ ބައެއް ފާޑުކިޔުން ވެސް ދޭތެރެދޭތެރެއިން އާއްމު ކުރާ ކައިޒީން ފާހަގަ ކުރެވެނީ މޮޑެލް ކުރާ އެހެން ދިވެހިންނާއި އަޅައި ބަލާއިރު އާދަޔާއި ހިލާފު ބޮޑު މުއްސަނދި ކަމެއްގައި އުޅޭ މީހެއްގެ ގޮތުގައެވެ.
އޭނާގެ އުފަން ދުވަސް ފާހަގަ ކުރުމުގެ ގޮތުން ބާއްވާ ހަރަކާތްތަކަށް އާއްމުންގެ ބޮޑު ސަމާލުކަމެއް ލިބިފައި ވެއެވެ. މީގެ ކުރިން ދުބާއީ އާއި އިންޑިއާގެ ތާޖުމަހަލް ފަދަ ތަންތަނުގައި ކައިޒީން އުފަންދުވަސް ފާހަގަކޮށް ވީޑިއޯތައް އާއްމު ކޮށްފައި ވެއެވެ. އެންމެ ފަހުން އޭނާގެ އުފަން ދުވަސް ފާހަގަ ކުރަން މިއަހަރުގެ އޭޕްރީލް 01 ވަނަ ދުވަހު މާލޭގައި ހަވާ ވެސް އެރުވިއެވެ.
ކައިޒީންގެ އިތުރުން ބައެއް ފިލްމީތަރިން ވެސް ގެންދަނީ ރައީސް ސޯލިހް އަށާއި އަދި އެހެން ކެންޑިޑޭޓުންނަށް ވެސް ތާއިދުކޮށް، ސިޔާސީ ހަރަކާތްތަކުގައި މިދުވަސްވަރު ބައިވެރިވަމުންނެވެ.
