ދިވެހި ޤައުމުގެ ވަތަނީ ބާރުވެރިކަން ދޫކޮށް، ދަރަނީގެ ދަންތުރައެއްގައި ދިވެހިން ޖެއްސި މީހުންނަށް ދިވެހި ރައްޔިތުން ދެން އިތުރު ފުރުސަތެއް ނުދޭނެކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުއިއްޒުގެ ކެމްޕެއިން މެނޭޖަރުންނަށް ގައުމީ އެއާލައިން، މޯލްޑިވިއަންގެ ކުރީގެ ފްލައިޓް އޮޕަރޭޝަންސް ޑިރެކްޓަރު މުހައްމަދު އަމީން ވިދާޅުވެއްޖެއެވެ.
މިމަހުގެ 9 ވަނަ ދުވަހު ބާއްވާ ރިޔާސީ އިންތިޚާބާއި ކުރިމަތިލާއިރު ރާއްޖޭގެ މިނިވަންކަމާއި، ދަރަނިވެރިކަމާއި ގެއްލިފައިވާ އިންސާފު ހޯދުމަކީ އިދިކޮޅު ޕްރޮގްރެސިވް ކޮންގްރެސް ކޯލިޝަންގެ އެންމެ ބޮޑު އަމާޒެވެ. ޤައުމުގައި ހުރި މައްސަލަތައް ހައްލުކޮށް ރައްޔިތުންނަކީ ފުދުންތެރި ބަޔަކަށް ހެދުމަށް ފުރިހަމަ ތަސައްވަރަކާއިއެކު ވެރިކަމަށް އައުމަށް މަސައްކަތް ކުރަމުންދާ އިދިކޮޅު ކޯލިޝަނުން ގެންދަނީ ޤައުމުގެ ހާލަތު ވަރަށް ރަނގަޅަށް ބަޔާންކޮށް ދެއްވަމުންނެވެ.
ޤައުމު މިހާރު އޮތް ހާލަތާއި ގުޅޭގޮތުން ކެޕްޓަން އަމީން ވިދާޅުވީ ރިޔާސީ އިންތިޚާބަކާއި ދިވެހިން ކުރިމަތިލާއިރު ރައްޔިތުންނަށް ގައުމުގެ ހާލަތު ވަރަށް ރަނގަޅަށް ސާފުވާނެކަމަށެވެ. ޤައުމުގެ މިނިވަންކަމާއި މެދު އެތައް ސުވާލެއް އުފެދި، އިންތިހާއަށް ދަރަނިވެރިވެ، އިސާފާއި ހަމަހަމަކަން ގާއިމް ނުކުރެވުނު ބަޔަކަށް ދިވެހި ރައްޔިތުން ދެވަނަ ދައުރެއް ނުދޭނެ ކަމީ އެއްވެސް ޝައްކެތް އޮތްކަމެއް ނޫންކަމަށް އަމީން ވިދާޅުވިއެވެ.
ތަފާތު ވިސްނުމުގައި ތިބި ހުރިހާ ދިވެހިން ނަކީވެސް އެއްބައެއް، އިގިލިން ގުނާލެވޭ ފަދަ މަދު މީސްކޮޅެއް ފިޔަވައި ކޮމްޕްރަމައިޒް ނުކުރާނެ ކަންތައްތަކެއްވޭ! ގައުމުގެ އަމިއްލަ ވަތަނީ ބާރު ދޫކޮއްލާ، ދަރަނީގެ އަޅުވެތިންނައް ދިވެހިން ހަދައި، އިންސާފާ ހަމަހަމަކަން ގެއްލުވާލި މީހުންނައް މިފަހަރަކު އިތުރު ޗޮއިސް އެއްނެތް!
– އަމީން ވިދާޅުވިއެވެ.
ސިޔާސީ ކަންކަމުގައި މާބޮޑަށް ބަސްކިޔައި ނުހެއްދެވި ނަމަވެސް އަމީންގެ ކަންބޮޑުވުން އެންމެ ބޮޑަށް ފާޅު ކުރަން ފެށީ ޤައުމީ އެއާލައިންގެ ހާލަތާއި ގުޅޭގޮތުންނެވެ. އެއާލައިންގެ މައްސަލަތައްވެސް ހައްލުނުވެ ރައީސް ޔާމީންގެ ޒަޢާމަތުގައި ގެނައި ތަރައްޤީ ނޫން ތަރައްޤީއެއް ގެނެވިފަައި ނުވެއެވެ. އަމީން ވަނީ މިފަހުން ޤައުމުގެ ހުރި ބޮޑެތި މައްސަކަތައް ފާހަގަ ކުރައްވައި އެކަންކަންވެސް ރައްޔިތުންގެ ސަމާލުކަމަށް ގެންނަވާފައެވެ.
ރިޔާސީ އިންތިޚާބުގެ ވޯޓުލުން ދެން އަންނަ ހޮނިހިރު ދުވަހު ކުރިއަށްދާއިރު އިންތިޚާބުގެ ވާދަވެރިކަން އެންމެ ބޮޑީ ޑރ. މުއިއްޒުއާއި ރައީސް ޞާލިހުއާއި ދެމެދުއެވެ. އިންތިޚާބުގެ ކެމްޕޭނަށް ކުޑަ މުއްދަތެއް ލިބުނު ނަމަވެސް ޑރ.މުއިއްޒު ގެންދަވަނީ ގިނަ ރަށްތަކަށް ވަޑައިގެން ކެމްޕޭން ހަރަކާތްތައް ފުޅާކޮށް ހިންގައި ރައްޔިތުންގެ ބޮޑު ތާއީދެއް ހޯއްދަވަމުންނެވެ.
