ވެރިކަން ލިބިއްޖެނަމަ އިޖްތިމާއީ ފްލެޓްތަކުގެ ކުލި މާފުކޮށްދެއްވާނެ ކަމަށް ޖުމުހޫރީ ޕާޓީގެ ލީޑަރު އަދި ރިޔާސީ ކެނޑިޑޭޓް ގާސިމް އިބްރާހިމް ވިދާޅުވެއްޖެއެވެ.
ގާސިމް މިއަދު ކުރެއްވި ޓްވީޓެއްގައި ވިދާޅުވީ ރައްޔިތުންގެ ތެރެއިން އެންމެ ބޮޑަށް ބޯހިޔާވަހިކަމަށް ބޭނުން ޖެހިފައިވާ މީހުންނަށް ސަރުކާރުން ދޫކުރާ ސޯޝަލް ހައުސިން އިން ދިގު މުއްދަތަށް ގިނަ އަދަދަކަށް ފައިސާ ނެގުމަކީ އިންސާފުވެރި ގޮތެއް ކަމަށް ގާބޫލު ނުކުރައްވާކަމަށެވެ.
ނަމަވެސް ދިވެހިދައުލަތުގައި އޮތް އެންމެހާ ރައްޔިތުންގެ ފައިސާ އިން ހިއްކާފައިވާ އެންމެ އަގުބޮޑު ބިންތައް ވަކި ބަޔަކަށް ދޭ އިރު، އެ ހައްގުނަ އެއްބައި ރައްޔިތުން މަހްރޫމުވެފައި، އަދި ހަމަ އެބިމުގައި އިމާރްކޮށްފައިވާ އިޖްތިމާއީ ބޯ ހިޔާވަހިކަމުގެ ކުދި ކުދި ފްލެޓް ތަކުން 25 އަހަރުން 2.5 މިލިއަން ރުފިޔާ ރައްޔިތުންގެ ތެރެއިން ގޯތި ގެދޮރުގެ ދަތިކަން އެންމެ ބޮޑު، އެންމެ ހާލުގައި ދިރިއުޅޭ މީހުންގެ އަތުން ނެގުމަކީ ކޮންކަހަލަ ހަމަ އަކުން، ކޮންކަހަލަ އިންސާފަކުން ކުރައްވާ ކަމެއްތޯ ގާސިމްގެ ޓްވީޓްގައި ސުވާލު ކުރައްވާފައި ވެއެވެ.
އެގޮތުން, ވެރިކަމުގެ ދައުރުގެ ތެރޭގައި 30،000 ހައުސިން ޔުނިޓް ގާއިމްކޮށް ބޭނުން ޖެހިފައިވާ އެންމެންނަށް ބޯހިޔާވަހިކަން ފޯރުކޮށްދޭނެ ކަމަށް ބުނެފައި ވެއެވެ. އޭގެތެރޭގައި ހިމެނެނީ މާލެ ސަރަހައްދުގައި އަޅާ 15،000 ހައުސިން ޔުނިޓް އަދި އަތޮޅު ތެރޭގެ 15،000 ހައުސިން ޔުނިޓެވެ. ގާސިމްގެ ވެރިކަމެއްގައި އަޅާ 30،000 ހައުސިން ޔުނިޓުގެ ތެރެއިން 18،000 ހައުސިން ޔުނިޓު ހާއްސަކުރަނީ އަލަށް ބޯހިޔާވަހިކަމެއް ނުލިބޭ ނުވަތަ އަލަތު ކައިވެންޏަކަށް ފަހު ދިރިއުޅުން ފަށާ ޒުވާނުންނަށެވެ.
މެނިފެސްޓޯގައި ބުނާ ގޮތުން ހިޔާ ފްލެޓާއި، ފުލުހުން އަދި ސިފައިންގެ ފްލެޓުތައް ފަދަ ކުރިން ލިބިފައިވާ ފްލެޓުތަކަށް ދައްކަން ޖެހޭ ކުލި މައާފްކޮށްދޭނެއެވެ. ފުލުހުންނާ ސިފައިންނަށް ހާއްސަކޮށް 1000 ފްލެޓު އަޅައި ވެރިކަމުގެ ފުރަތަމަ ތިން އަހަރު ތެރޭގައި ހަވާލުކޮށްދޭން ވެސް ގާސިމް ވައުދު ވެއެެވެ.
އޭގެ އިތުރުން ގާސިމް މީގެ ކުރިން ވިދާޅުވެފައި ވަނީ އޭނާގެ ވެރިކަމެއްގައި ކޮންމެ ރަށަކުން އެދޭ ފަސް ކަމެއް ކޮށްދެއްވާނެ ކަމަށެވެ.
