ޑިފެންސް މިނިސްޓަރ މާރިޔާ އަހުމަދު ދީދީ އުޅުއްވަނީ ޕީއެންސީިގެ ރިޔާސީ ކެންޑިޑޭޓް ޑރ.މުއިއްޒާއި އަޅައި ގަނެގެން ކަމަށާއި، އެކަމަނާއަކީ ރާއްޖޭގެ ދިފާއި ވަޒީރަކަށް ކުފޫ ހަމަވާ ބޭފުޅެއް ނޫން ކަމަށް ކުރީީގެ ޑިފެންސް މިނިސްޓަރ އަދި ޕީއެންސީގެ ނައިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ ދުވާފަރުގައި ބޭއްވި ޖަލްސާގައި އާދަމް ޝަރީފް ވިދާޅުވީ ރާއްޖޭގެ ދިފާއީ ވަޒީރަކީ އެންމެންނަށް ނަމޫނާ ބޭފުޅަކަށް ވާންޖެހޭ ކަމަށެވެ. ބަސް މަގާއި އަމަލާއި އަޚުލާގުންވެސް އެހެން މީހުންނަށް ތިމާއަކީ ނަމޫނާ ބޭފުޅަކަށް ވާންޖެހޭކަމަށެވެ. ރިޔާސީ ކެމްޕޭންގައި ރައީސް ޞާލިހުގެ ތަރުޖަމާނަކަށް ވެވަޑައިގެން މާރިޔާ ކޮންމެ ދުވަހަކު ބާއްވާ ޕްރެސްގައި ގެންދަވަނީ ޕީއެންސީގެ ކެންޑިޑޭޓް ޑރ.މުއިއްޒުއަށް ވަރަށް ބޮޑަށް ފާޑު ވިދާޅުވަމުންނެވެ. އަދި މުއިއްޒުގެ އަނބިކަނބަލުންނާއި ޢާއިލާއާއިވެސް ގެންދަނީ ވަރަށް ޒާތީކޮށް ދިމާކޮށް ވާހަކަ ދައްކަވަމުންނެވެ.
އާދަމް ޝަރީފް ވިދާޅުވީ ޤައުމުގެ ދިފާއި ވަޒީރަކަށް ހުންވައި މާރިޔާ ރިޔާސީ ކެންޑިޑޭޓުންގެ އަބުރު ނަގާލައި އާއިލާގެ ބޭފުޅުންނާއި ބެހި ހިތުހުރި އެއްޗެއް ގޮވަމުންދާއިރު ތިމާގެ ހާލަތާއިމެދު ވިސްނާލަންޖެހޭ ކަމަށެވެ. މިފަދަ ބޭފުޅަކު ޤައުމުގެ ދިފާއީ ވަޒީރަކަށް ހުރުމަށްވުރެ ރަނގަޅުވާނީ އިސްތިއުފާ ދެއްވުންކަމަށް އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ ރައީސް މުހައްމަދު ނަޝީދަށް ދިން ޓެރަރިސްޓް ހަމަލާއަކީ ކިހިނެތް ހިނގާދިޔަ ކަމެއްކަން ވަރަށް ސާފުކަމަށެވެ. އެކަން އޮއްބާލައި މާރިޔާ މިއަދު ނިކުމެ އެހެން މީހުންގެ ވާހަކަ ދައްކަވާއިރު ތިމާއަށް ކުރެވޭ ތުހުމަތުތަކާއި އުޅެވިފައިވާ ގޮތްތައް އެހެން މީހުން ކިޔައިދޭން ޖެހޭނަމަ ފަލީހަތްވާނީ ކޮން ބޭފުޅެއްކަން ސާފުކަމަށް އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ ޕިީޕީއެމް ޕީއެންސީއަކީ އަބަދުވެސް އަހުލާގީ މިންގަނޑުގެ ތެރެއިން ކަންކަންކުރާ ތައްޔިތުންނަށް ނަމޫނާ ޕާޓީއެއްކަމަށެވެ. އަދި ކުރާ ކޮންމެ ކެމްޕޭނެއްވެސް ކުރާނީ ރީތި އަހުލާގުގެ ތެރެއިން ކަމަށް އާދަމް ޝަރީފް ވިދާޅުވިއެވެ.
