ރިޔާސީ އިންތިިޚާބަށް 10 ދުވަހަށް ވެފައިވާއިރު މުޅި ރާއްޖެއިން ފެންނަނީ އެއް މަންޒަރެއް ކަމަށާއި، މިއިންތިޚާބުގައި އެމްޑީޕީގެ ޢާންމު މެމްބަރުންނަށްވެސް ލާވޯޓަކީ ބޭކާރު ނުވާނީ ޑރ.މުއިއްޒުއަށް ވޯޓު ދެއްވައިގެންކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ ކުރީގެ މެމްބަރު މުހައްމަދު ފަލާހު ވިދާޅުވެއްޖެއެވެ.
ދުވާފަރުގެ ގިނަ އަދަދެއްގެ ބަޔަކާއިއެކު ބޭއްވި މިޖަލްސާގައި ވާހަކަ ދައްކަވަމުން ފަލާހު ވިދާޅުވީ ރައީސް ޔާމީންގެ ތަސައްވަރާއި އެއްގޮތަށް ރ.އަތޮޅުގެ ތަރައްޤީ މިސަރުކާރުން ކުރިއަށް ގެންދިޔަނަމަ ރ.އަތޮޅުގެ ރައްޔިތުން ތިބޭނީ މިހާލަތުގައި ނޫންމަށެވެ. ފަތުރުވެރިކަމާއި، މަސްވެރިކަމާއި އެނޫންވެސް އިޤްތިޞާދީ މަސައްކަތްތައް އިންތިހާއަށް ޕްލޭން ކުރެއްވިކަމަށެވެ. ނަމަވެސް މިކަން ނުވެދިޔައީ މިއައި ސްލޯ ސަރުކާރެއްގެ ސަބަބުންކަމަށެވެ.
ފަލާހު ވިދާޅުވީ ދުވާފަރު ރައްޔިތުންނަކީ މިއިންތިޚާބުގައި ޑރ.މުއިއްޒަށް އެންމެ ބޮޑު ނަތީޖާއެއް ދެއްވާނެ ރައްޔިތުން ތިބި އެއްރަށަށް ވާނެ ކަމާއިމެދު ޝައްކު ނުކުރައްވަކަމަށެވެ. ދުވާފަރުން އުފެދިގެން އައި ޤައުމީ ބަތަލު ދަންޑެހެލު ފަދައިން ދުވާފަރުގެ ކޮންމެ މީހަކީވެސް މިއަދު ދަންޑެހެލެއް ކަމަށް ފަލާހު ވިދާޅުވިއެވެ.
ރިޔާސީ ކެމްޕޭންގެ މިހާރު ފަހު 10 ދުވަހަށް ވެފައިވާއިރު ފަލާހު ވިދާޅުވީ ފެންނަނީ މުޅި ރާއްޖެ ޑރ.މުއިއްޒާއިއެކު އޮތްތަން ކަމަށެވެ. މިއިންތިޚާބުގައި ވާދަކުރާ އެހެން ކެންޑިޑޭޓުންނަށް ވޯޓު އަޅަންތިއްބެވި އެތައް ރައްޔިތުން ތަކެއް މިއަދު ވަނީ ޑރ.މުއިއްޒަށް ވޯޓު ދެއްވަން ނިންމަވާފައިކަމަށް ފަލާހު ވިދާޅުވިއެވެ. އޭގެ ތެރެއިންވެސް އެމްޑީޕީގެ ގިނަބަޔަކު އެމީހުންލާ ވޯތަކީ ބޭކާރު ވޯޓަކަށް ނުހަދައި މުއިއްޒަށް ވޯޓު ދެއްވާކަމީ އުފާ ކުރައްވާ ކަމެއްކަމަށް ފަލާހު ވިދާޅުވިއެވެ.
މިކަން ނިމިއްޖެ އިގޭތޯ. މިދުވާފަރުން މިދެއްކީ އެއްބުރުން މިކަން ނިންމާތަން. އަޅުގަނޑު ދަންނަވާނީ މިއިންތިޚާބުގައި އެމްޑީޕީގެ މެމްބަރުންވެސް ދެއްވާ ވޯޓު ބޭކާރު ވޯޓަކަށް ނުހައްދަވާ ޑރ.މުއިއްޒުއަށް ވޯޓު ދެއްވުން.
– ފަލާހު ވިދާޅުވިއެވެ.
ފަލާހު ވިދާޅުވީ ދުވާރުގެ އިތުރުން މުޅި ރ.އަތޮޅުވެސް އޮތީ އެއް އަޒުމެއްގައި މިސަރުކާރުން ރ.އަތޮޅުގެ ރައްޔިތުންގެ ތަރައްޤީއަށް ވީ ބޭވަފާގެ ނަތީޖާ ވޯޓުން ދައްކަން ތައްތާޔަށް ކަމަށެވެ.
