ކޮރޯނާ ވައިރަސްގެ މި ޕެންޑަމިކުގެ ސަބަބުން ވަރަށް ގިނަ މީހުންނަށް އެކިކަހަލަ ނަފްސާނީ މައްސަލަތަކާ ކުރިމަތި ލާންޖެހުނެވެ. އަދި އެކަނި ވެރިވުމުން ވާ އިހުސާސް ސޯޝަލް ޑިސްޓެންސިންގެ ސަބަބުން ވަނީ އެންމެނަށް އިހުސާސްވެފައެވެ.
އެކަނިވެރި ވުމުން ސަކަރާތް ޖަހާލައި މަޖާކޮށްލާ ހެދުމަށާއި، ކަންކަން ހިއްސާކުރުމަށް ގާތް ރައްޓެހިންނަކީ ވަރަށްވެސް މުހިންމު ބައެކެވެ. އަދި ގިނަ ދުވަސް ވީ ވަރަކަށް ރަހުމަތްތެރިންނަކީ އެމީހެއްގެ ސަޕޯޓް ސިސްޓަމަށް ވެދެއެވެ. ނަމަވެސް ބައެއް ރައްޓެހިން ފަހުން ހަތުރުންނަށް ވާތަން ވެސް ފެނެއެވެ.
މި ކިޔައިދެނީ ނުރަނގަޅު، އަދި އަމިއްލަ އެދުމަށް އުޅޭ ރަހުމަތްތެރިއެއްނަމަ ފެންނާނެ ބައެއް ސިފަތަކެވެ.
ރަހުމަތްތެރިން އަބަދުވެސް އެކަކު އަނެކަކުގެ އެހީއަށް އެދޭނެއެވެ. ނަމަވެސް އަބަދުވެސް އޭނާގެ އަމިއްލަ ކަމަކާ ހެދި އުޅޭނަމަ އެއީ ރަނގަޅު ރަހުމަތްތެރިއެއް ނޫނެވެ. މިސާލަކަށް ތިމާ އެއްވެސް ކަމެއް ކުރަން ބޭނުން ނުވާ ދުވަހެއްގައި ކިޔަކިޔައިގެން ޝޮޕިންއަށް ގެންދިއުން ފަދަ ކަންކަމެވެ. ނަމަވެސް ތިމާ ކަމެއް ބޭނުން ވުމުން ކޮންމެވެސް ބަހަނާއެއް ދައްކާ ތިމާގެ މައްސަލަތައް އަޑުނާހާނެއެވެ.
ދެވަނަ ކަމަކީ އެހެން މީހުންނާ އެކީ އުޅޭނަމަ ހިތްހަމަނުޖެހި ރުޅި ހަދާނެއެވެ. އެ ކަހަލަ ރައްޓެހިން، ސްކޫލުން ނުވަތަ ކޮލެޖުން ދިމާވާ އެހެން މީހުންނާ ވާހަކަ ދައްކާ ހަދާނަމަ ރުޅިއަންނާނެއެވެ.
ދެން ފެންނާނެ ކަމަކީ ތިމާ ކުރާ މަސައްކަތް ނުފެނި އަބަދުވެސް ތިމާއަކީ ދަށް މީހެއްގެ ގޮތުގައި ދެކޭ ރައްޓެހިންނެވެ. މިސާލަކަށް ހެދުމެއް ލައިފިނަމަ ނުގުޅޭ ވާހަކަ ބުނުމާއި މަސައްކަތެއް ކުރަން އުޅޭނަމަ ހުނަރެއް ނެތް ކަމަށް ބުނާނެއެވެ. އަދި އަމިއްލަ ނަފްސަށް އޮތް އިތުބާރު ގެއްލުވާލާނެއެވެ.
މި ފަދަ ގޮތަށް ރަހުމަތްތެރިން ކަންތައް ކުރާނަމަ އެމީހަކާއި ގުޅުން ކަނޑާލުމުގައި ފަސްނުޖެހޭށެވެ. އަމިއްލަ ނަފްސަށް ވިސްނާފައި ދޫކޮށްލާށެވެ.
