އެމްޑީޕީގެ ކުރީގެ ރައީސް މުހައްމަދު ނަޝީދު އެޕާޓީން ދިއުމަކީ، އެޕާޓީއަށް ލިބުނު އެންމެ ބޮޑު ކުރިއެރުން ކަމުގައި އެމްޑީއޭގެ ރައީސް އަހްމަދު ސިޔާމް މުޙައްމަދު ވިދާޅުވެއްޖެއެވެ.
ރިޔާސީ ކެމްޕޭންގައި ތ.ތިމަރަފުށީގައި ބޭއްވި ޖަލްސާގައި ވާހަކަ ދައްކަވަމުން ސިޔާމް ވިދާޅުވީ އެމްޑީޕީއަށް މާޒީގައި ކުރިމަތިވި ފާޑުކިޔުންތަކާއި މީހުންގެ ނުރުހުން މިއަދު އެއްކޮށް ނެތިގޮސްފައިވާކަމަށެވެ. މިކަންވީ މީގެ ކުރިން އެމްޑީޕީގެ ލީޑަރޝިޕްގައި ތިއްބެވި ބޭފުޅުން ގެންގުޅުނު އިސްލާމް ދީނާ ދުރު ދިވެހިންނާއި ދުރު ސިޔާސަތުތަކުގެ ސަބަބުންނެވެ.
އަޅުގަނޑު ދަންނަވާނީ ރައީސް ނަޝީދު އެމްޑީޕީން ދިއުމަކީ ތިޔަބޭފުޅުންގެ ނަސީބޭ. ތިބޭފުޅުން މާތް ރަސްކަލާންގެ އަށް ހަމްދުކޮށް ޝުކުރުކުރަންޖެހޭ އެކަމަށް. މީގެ ކުރިން އިސްލާމް ދީނަށް ފުރައްސާރަކޮށް ހަޖޫޖެހުމަކީ އާންމުކަމެއް. މިއަދު އެހެންތޯ މިއަދު ތިޔަބޭފުޅުންގެ ލީޑަރުގެ ފަރާތްޕުޅުން ފެންނަނީ އެއާއި މުޅިން ޚިލާފް ރީތި ސިފަތަކެއް.
– ސިޔާމް ވިދާޅުވިއެވެ.
ސިޔާމް ވިދާޅުވީ އެ ގައުމީ މަސައްކަތުގައި ފެޔަށް ޖެހި ގައުމަށް ދެރަ ގޮތެއްވުމަކީ އެއްގޮތަކަށް ވެސް ބޭނުންވާނެ ގޮތެއް ނޫންކަމަށެވެ. އެއީ ރައީސް އިބްރާހިމް މުޙައްމަދު ޞާލިހާއެކު މަސައްކަތްޕުޅު ކުރައްވާ ސަބަބުކަމަށް ސިޔާމް ވިދާޅުވިއެވެ. އެގޮތުން އެ މަނިކުފާނު ވިދާޅުވީ އިގްތިޞާދު ދެގުނަކޮށް އުފާވެރި އަމާން ރާއްޖެއެއް ބިނާކުރުމަކީ މި ވަގުތު ކުރަން އޮތް މަސައްކަތްކަމަށެވެ.
އެއާއެކު އޭނާ ވިދާޅުވީ މިހާތަނަށް އެ މަނިކުފާނަށް ފެނިވަޑައިގެން އެންމެ ހިކުމަތްތެރި ލީޑަރަކީ ރައީސް ޞާލިހު ކަމަށެވެ. މީގެ އިތުރުން ސިޔާމް ވިދާޅުވީ ކޮންމެ ކަމެއް ވެސް ހާސިލްކުރެވޭނީ އެ ކަމެއް ކުރުމުގެ ޝައުގާއެކުކަމަށެވެ. އޭނާ ވިދާޅުވީ ރައީސުންނާއި މަޖިލިސް މެމްބަރުންނާއި، ކައުންސިލްތަކުގެ ވެރިން ވެސް މަސައްކަތް ކުރަންވާނީ ރައްޔިތުންނަށް ޚިދުމަތްކޮށްދިނުމަށް ކަމަށެވެ.
