ރާއްޖޭގެ ރަށްރަށުގައި އިންސާނުންނަށް ދިރިއުޅެވޭ ވަރަށް ކަންކަން ހަމަޖެއްސުނީ އަދި ކިރިޔާ ކަމުގައި ރައީސް ސާލިހު ވިދާޅުވެއްޖެއެވެ.
ކުރިޔަށް އޮތް ރިޔާސީ އިންތިޚާބަށް ކެމްޕޭން ކުރެއްވުމަށް ތ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި، މިއަދު ތ. ހިރިލަންދޫގައި ވާހަކަ ދައްކަވަމުން ރައީސް ސާލިހު ވިދާޅުވީ އެމަނިކުފާނު ވެރިކަމާ ހަވާލުވެވަޑައިގެންނެވިއިރު، ގިނަ ރަށްތަކުގައި ސާފު ބޯފެން ނުލިބޭ ކަމަށާއީ، ފާޚާނާ ނިޒާމްތައް ގާއިމް ކުރެވިފައި ނުވާކަމަށާއި، އެކަށީގެންވާ ގޮތުގައި ކަރަންޓު ނުލިބޭކަމަށާއި، ސިޙީ ޚިދުމަތްވެސް ލިބެން ނެތްކަމުގައެވެ.
އެހެންވެގެން ނޫންތޯ 127 ރަށަށް އަޅުގަޑުމެންނަށް އެމްބިއުލާންސް ފޯރުކޮށްދޭން ޖެހުނީ. މިއީ އެންމެ އާދައިގެ ކަންތައްތައް. އެމްބިއުލާންސް ފޯރުކޮށްދޭންޖެހުން، މިއީ އެންމެ އާދައިގެން ކަންތައްތައް. ކަރަންޓުވެސް ހަމަ އެހެން. 152 ރަށުގަ އިންޖީނުގެ އަޅަންޖެހުނު. ޖަނަރޭޓަރު ބަދަލުކުރަން ޖެހުނު. ނެޓްވާރކް ބަދަލުކުރަން ޖެހުނު. މިއީ އިންސާނުން އުޅުނު ގައުމެއް. ވެރިކަން ކުރިއޭ. އެހެންނަމަވެސް މިއިން ކަމެއް ހަދާނަކު ނެތް. ބަނދަރުވެސް އެހެން. 125 އަށްވުރެ ގިނަ ރަށުގަ ބަނދަރު ފުންކޮށް ބަނދަރު ބޮޑުކޮށް ބަނދަރުގެ ޚިދުމަތް ހޯދުމަށް ރައްޔިތުންނަށް ފޯރުކޮށްދިނުމަށްޓަކާ މަސައްކަތް ކުރަންޖެހުނު.
މިއަދު ހިރިލަންދޫގައި ބޭއްވުނު ކެމްޕޭން ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ، އަސާސީ މިޚިދުމަތްތައް ގާއިމް ނުކުރެވި ދިޔައީ ދައުލަތުގައި ފައިސާ ނެތިގެން ނޫންކަމަށާއި، އެހެންނަމަވެސް އެކަންކަން ކުރުމުގެ ވިސްނުމާއި ފިކުރު ނެތިގެން ކަމުގައެވެ. އިތުރަށް ރައީސް ސާލިހު ވިދާޅުވީ ކަންކަން ކުރުމުގެ ވިސްނުމާއި ފިކުރު ނެތް ބަޔަކަށް ދެންވެސް އެކަންކަން ނުކުރެވޭނެ ކަމަށާއި، ކުރެވޭނެހާވެސް ކަމަކީ ފައިސާއިން ޖީބުތައް ބަރު ކުރުން ކަމުގައެވެ.
ރައީސް ސާލިހު މިހާރު ތ. އަތޮޅަށް ކުރައްވަމުން ގެންދަވާ ދަތުރުފުޅުގައި އެމަނިކުފާނު މިރޭ ތ. ތިމަރަފުއްޓަށް ވަޑައިގަތުމުން އެރަށުން ވަނީ އެކަނިކުފާނަށް ހޫނު މަރުހަބާއެއް ކިޔާފައެވެ.
ކޮމެންޓު ފޮނުވާ