ޕީޕީއެމް-ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ މެނިފެސްޓޯ އޮންލައިންކޮށް ބެލޭ ގޮތަށް ހާއްސަ ވެބްސައިޓެއް ހަދައިފިއެވެ.
ޑރ. މުއިއްޒުގެ މެނިފެސްޓޯ އޮންލައިންކޮށް ބެލޭ ގޮތް ހަދާފައިވާއިރު މެނިފެސްޓޯ ރަސްމީކޮށް ލޯންޗުކުރީ މިމަހުގެ 20 ވަނަ ދުވަހުގެ ރޭ ހުޅުމާލޭ ފޭސް ދެއެއްގައި ބޭއްވި ޖަލްސާއެއްގައެވެ. މެނިފެސްޓޯގައި 19 ދާއިރާއަކުން މުއިއްޒުގެ ވެރިކަމެއްގައި ކުރަން ނިންމާފައިވާ ކަންތައްތައް ވަނީ ހިމަނާފަ އެވެ.
މެނިފެސްޓޯގައި މުއިއްޒު ވިދާޅުވީ ރާއްޖޭގެ ތަރައްގީއަށް ކުރަން ގިނަ ކަންތައްތަކެއް އެބަހުރި ކަމަށާއި އެ މަސްއޫލިއްޔަތުތައް އަދާކުރުމަށް ކޮންމެ ފަސް އަހަރަކުން އެއް ފަހަރު ޑިމޮކްރެޓިކް އުސޫލުން ސަރުކާރަކާ މަތިކުރެވޭ ކަމަށެވެ. މުއިއްޒު އިތުރަށް ވިދާޅުވީ ގައުމުގެ ތަރައްގީއަށް މަޝްރޫއުތަކެއް ހިންގުމަށް ވައުދުވެއްޖެނަމަ އެ ކަންކަން ކޮށް ނިންމާފައިވާކަން ރައްޔިތުންނަށް ފެންނަންވާނެ ކަމަށާއި އޭގެ އުފަލާ ހިތްހަމަ ޖެހުމާ ފަސޭހަކަން ރައްޔިތުންނަށް ލިބިލިބި އޮންނަންވާނެ ކަމަށެވެ.
މެނިފެސްޓޯގައި ހިމެނޭ 19 ދާއިރާ:
– ޒުވާނުން
– ކަނބަލުން
– މަސްވެރިކަން
– ގެދޮރުވެރިކަމާއި އާބަނައިޒޭޝަން
– އޯގާތެރި މުޖުތަމައު
– އިސްލާމީ ނޫރާއި ދީނީ އަގީދާ
– ވަޒީފާއާއި ވުނޭރުކަން
– ތައުލީމާއި ތަމްރީން ޓެކްނޮލޮޖީ އަދި ޑިޖިޓަލައިޒޭޝަން
– ފިލްމީ ދާއިރާ، ފަންނުވެރިކަން އަދި މިއުޒިކް
– ކުޅިވަރާއި ކަސްރަތު
– ސިއްހީ ނިޒާމާއި ފަރުވާ
– ސަރުކާރު ހިންގުމާއި ސިޔާސަތު ރޭވުން
– އިގުތިސާދާއި މާލިއްޔަތު
– އުމްރާނީ ތަރައްގީ އާއި މަޝްރޫއުތައް
– ފަތުރުވެރިކަން
– ދަނޑުވެރިކަމާއި ކާބޯތަކެތި
– ތިމާވެއްޓާއި ހަކަތަ އަދި ދެމެހެއްޓެނިވި ތަރައްގީ
– ދުސްތޫރީ، ގާނޫނީ އަދި ޝަރުއީ އިސްލާހު
ޕީޕީއެމް މެނިފެސްޓޯގައި ހިމަނާފައިވާ ކަންކަމުގެ ތެރޭގައި ޕޭޕެލް، ޕެއޮނިއާ، ސްޓްރައިޕް، ސްކްރިލް އަދި ނެޓެއްލާ ފަދަ ޕްލެޓްފޯމްތައް މެދުވެރިކޮށް ފައިސާ ފޮނުވުމާއި ފައިސާ ލިބުން ހަމަޖެއްސުން ހިމެނެ އެވެ.
މުޢިއްޒު ވިދާޅުވީ މެނިފެސްޓޯގައި އެންމެ މުހިންމު އަދި އެންމެ ބޮޑު މަސައްކަތެއްގެ ގޮތުގައި ހިމަނުއްވާފައިވަނީ ގެދޮރުވެރިކަމާއި، އާބަނައިޒޭޝަންކަމަށެވެ. މުޖުތަމަޢުގައި ހުރި ކޮންމެ މައްސަލައެއްވެސް ގުޅި ނިމިގެން އަންނަނީ، ބޯހިޔާވަހިކަމުގެ މައްސަލައާއި ކަމަށް ވިދާޅުވިއެވެ. އެހެންކަމުން މުޅި ރާއްޖޭގައި ހުރި މައްސަލަތަކުގެ އެންމެ ބޮޑު ހައްލަކަށް ވާނީ ރައްޔިތުން ގެދޮރުވެރިކުރުވުން ކަމަށް މުޢިއްޒު ވިދާޅުވިއެވެ.
މުޢިއްޒުގެ މެނިފެސްޓޯގައި ވަނީ، ކުރިއަށް އޮތް 20 އަހަރަށް ޢަމާޒުކޮށް 65000 ގެދޮރު ޔަގީންކޮށްދެއްވާނެކަމަށް ވިދާޅުވެފައެވެ. އެގޮތުން ޤާނޫނުން ލިބިދޭ ބޯހިޔާވަހިކަމުގެ ޙައްގުގެދަށުން، އަމިއްލަ ބޯހިޔާވަހިކަން ނެތް އެއްވެސް ރައްޔިތެއް ނެތްކަން ކަށަވަރުކުރައްވާނެކަމަށް ވިދާޅުވިއެވެ.
މުޢިއްޒު ވިދާޅުވީ މި ސަރުކާރުގެ ގޯތި ލިސްޓުގައި ތިބި މީހުންނަށްވެސް، ލިސްޓު އުވާނުލާ ގޯތި ލިބޭނެކަން ކަށަވަރުކުރައްވާނެކަމަށެވެ. އަދި މީގެތެރެއިން ބިން ލިބި ގޯތި އެޅޭނެ މާލީ ތަނަވަސްކަން ނެތް މީހުންނަށް، އެމަނިކުފާނުގެ ސަރުކާރުގައި ޚާއްސަ ސްކީމެއްގެ ތެރެއިން ގޯތި އެޅޭނެ ގޮތް ހަމަޖައްސަވާދެއްވާނެ ކަމަށް ވިދާޅުވެއެވެ.
މީގެއިތުރުން، 2018ވަނަ އަހަރު ހިޔާ މަޝްރޫޢުގެ ލިސްޓުގައި ހިމެނި، ފްލެޓް ނުދީ ތިބި މީހުންނަށް ގޯތި ކަށަވަރުކޮށްދެއްވުމަށް މެނިފެސްޓޯގައި ހިމަނުއްވާފައިވެއެވެ.
