ކާމިޔާބު ސައި-ފައި ފިލްމު 'ޑޫން’ގެ ދެވަނަ ބައި މި އަހަރު ރިލީޒްކުރާ ގޮތަށް ކުރިން އޮތް ނަމަވެސް، އެ ފިލްމު އަންނަ އަހަރަށް ފަސްކޮށްފި އެވެ.
ކުރިން ނޮވެމްބަރު މަހުގެ 3 ވަނަ ދުވަހަށް ސިނަމާތަކަށް ގެނައުމަށް ތާވަލް ކޮށްފައި އޮތް ފިލްމް އަންނަ އަހަރަށް ފަސްވެފައި ވާ އިރުގައި މިހާރު ފިލްމް އެޅުވުމަށް ތާވަލް ކޮށްފައިވަނީ އަންނަ އަހަރު މާޗު 24 ގަ އެވެ.
ބޮޑޫ ބަޖެޓަކުން ވަރަށް ބުރަ މަސައްކަތް ކޮށްގެން ހަދައިފައި އޮތް 'ޑޫން: ޕާޓް ޓޫ' އަކީ މި އަހަރަށް އެންމެ އިންތިޒާރު ބޮޑު އެއް ފިލްމެވެ. ފިލްމް ލަސްވެފައި ވާކަން ކަށަވަރުކޮށްދީ، ވޯނާ ބްރޯސް އިން ބުނިގޮތުގައި "ޑޫން"ގެ ސީކުއެލް ނެރޭނީ އަންނަ އަހަރުގެ މާޗުގެ 24 ގައި ކަމަށެވެ.
ރިޕޯޓްތައް ބުނި ގޮތުގައި، އެ ފިލްމު ފަސްކުރަން ޖެހުނީ ހޮލީވުޑްގެ "ރައިޓާސް ސްޓްރައިކް" ނުވަތަ ސްކްރީންރައިޓަރުންގެ މުޒާހަރާއާ ގުޅިގެންނެވެ. އެ މުޒާހަރާއާ ގުޅިގެން އެހެން ބައެއް ފިލްމާއި ސީރީޒްތައް ވެސް ގެނެސްދޭ ތާރީހުތައް ވަނީ ފަސްކޮށްފަ އެވެ.
ފިލްމްގެ ފުރަތަމަ ބައިގެ ލީޑުން ފެނުނު ޓިމޮތީ ޝަލަމޭ އާއި ޒެންޑާޔާ އަދި ރިބެކާ ފާގަސަންގެ އިތުރުން ޖޯޝް ބްރޯލިން އާއި ހަވިއޭ ބާޑެމް ވެސް ފެނިގެން ދިއައެވެ. އަދި ދެވަނަ ފިލްމުގައި ފްލޮރެންސް ޕަފް އަދި އޯސްޓިން ބަޓްލާ ވެސް މުހިންމު ރޯލަކުން ފެންނާނެ އެވެ.
