ޓުއަރިޒަމް މިނިސްޓަރ ޑރ. މައުސޫމް އެމްޑީޕީއަށް ސޮއި ކުރައްވައިފިއެވެ.
ޑރ. މައުސޫމް އެމްޑީޕީއަށް ސޮއި ކުރެއްވުމަށްފަހު މިރޭ ފޯމު ހަވާލު ކުރައްވާފައިވަނީ ރައީސް ސާލިހުއާއެވެ. ޑރ. މައުސޫމް އެމްޑީޕީއަށް ސޮއި ކުރައްވާފައިވާއިރު، އޭނާވަނީ މީގެ ދުވަސްކޮޅެއް ކުރިން ރައީސް ސާލިހަށް ތާއީދު ކުރައްވާކަންވެސް ހާމަކުރައްވާފައެވެ.
ޑރ. މައުސޫމު ޓުއަރިޒަމް މިނިސްޓަރުކަމަށް ވަޑައިގެންނެވުމުގެ ކުރިން ޖުމުހޫރީ ޕާޓީގެ ސްލޮޓެެއްގައި ހުންނެވީ ސިންގަޕޯރއަށް ކަނޑައަޅުއްވާފައި ހުންނަވާ ސަފީރުކަމުގެ މަގާމުގައެވެ. އޭރު އޭނާއަކީ ޖުމުހޫރީ ޕާޓީގެ މެމްބަރެއްވެސް މެއެވެ. އޭނާ ޓުއަރިޒަމް މިނިސްޓަރުކަމާއި ހަވާލުވެވަޑައިގަތީ، އެމަގާމުގައި ޖޭޕީގެ ސްލޮޓެއްގައި ހުންނެވި ކުރީގެ ޓުއަރިޒަމް މިނިސްޓަރު އަލީވަހީދު ޖިންސީ ފުރައްސާރައިގެ މައްސަލައެއްގައި މަގާމުން ވަކި ކުރެއްވުމާއި ގުޅިގެންނެވެ.
ކުރިޔަށް އޮތް ރިޔާސީ އިންތިޚާބަށް އެންމެ ދެ ހަފްތާއަށް ވެފައިވާއިރު، ސަރުކާރުގެ ސިޔާސީ މަގާމްތަކުގައި ތިއްބެވި އެހެން ޕާޓީތަކުގެ މެމްބަރުން ދަނީ އެމްޑީޕީއަށް ސޮއި ކުރައްވަމުންނެވެ.
އެހެންނަމަވެސް ރައީސް ސާލިހުގެ ކެބިނެޓްގައި އަދިވެސް އެމްޑީޕީއަށް ސޮއި ނުކުރައްވާ، އެހެން ޕާޓީތަކަށް ނިސްބަތްވާ ވަޒީރުން ތިއްބެވިކަން ފާހަގަ ކޮށްލެވެއެވެ. އޭގެ ތެރޭގައި އެމްއާރުއެމްގެ ސްލޮޓުގައި ކެބިނެޓުގައި ތިއްބެވި ހަޔަރ އެޑިއުކޭޝަން މިނިސްޓަރ ޑރ. އިބުރާހިމް ހަސަންއާއި، ހެރިޓޭޖް މިނިސްޓަރ ޔުމްނާ މައުމޫންގެ އިތުރުން ޖޭޕީގެ ސްލޮޓުގައި ތިއްބެވި ފިޝަރީޒް މިނިސްޓަރ ޑރ. ހުސެއިން ރަޝީދުއާއި، ޓްރާންސްޕޯޓު މިނިސްޓަރ ކަމުގައި ހުންނެވި އާއިޝަތު ނަހުލާވެސް ހިމެނެއެވެ.
