ޑިމޮކްރެޓްސްގައި އުޅުއްވުމަށްފަހު ވިސްނުން ބަދަލުކޮށް އަލުން އެމްޑީޕީއާއި ގުޅުނީ ގިނަ ރައްޔިތުން އެދޭ ގޮތަކީ އެއީކަމަށް ވުމުން ކަމުގައި ތޮއްޑޫ ދާއިރާގެ މެމްބަރު ހަސަން ޝިޔާން ވިދާޅުވެއްޖެެެއެވެ.
އަލުން އެމްޑީޕީ އަށް ސޮއި ކުރެއްވުމަށް ފަހު ކުރެއްވި ޓްވީޓެއްގައި މެމްބަރު ޝިޔާން ވިދާޅުވީ ތޮއްޑޫ ދާއިރާ އާއި މުޅި ރާއްޖޭގެ ގިނަ ރައްޔިތުންގެ ވިންދާ އެއްގޮތަށް ވިސްނުން ބަދަލުކޮށް އެމްޑީޕީއާ އަލުން ގުޅިފައިވާކަމަށެވެ. މި ނިންމުމަކީ އެންމެ ރަނގަޅު ނިންމުންކަން ހާމަކޮށް ޝިޔާން ވަނީ މިއިންތިޚާބު އެއްބުރުން ރައީސް ޞާލިހު ކާމިޔާބު ކުރާނެކަމަށް ވިދާޅުވެފައެވެ.
ދާއިރާއާއި މުޅި ރާއްޖޭގެ ގިނަ ރައްޔިތުންގެ ވިންދާއެއްގޮތަށް އަޅުގަނޑުގެ ވިސްނުން ބަދަލުކޮށް އެމްޑީޕީއާއި އަލުން ގުޅިއްޖައިން. ތޮއްޑޫ ދާއިރާއގެ ސާފު ބޮޑު އައުލަބިއްޔަތާއިއެކު ރައީސް ޞާލިހު މިއިންތިޚާބު އެއްބުރުން ކާމިޔާބު ކުރައްވާނެ.
– ޝިޔާން ވިދާޅުވިއެވެ.
Dhaairaa aai mulhi raajjeyge gina rayyithunge vindhaa egothah alhuganduge visnun badhalukoh @MDPSecretariat aa alun gulhijjain. IA Thoddoo Dhaairaa ge saafu bodu aghlabiyyathaa eku Raees @ibusolih mi inthikhaabu 1 burun kaamiyaabu kuravvaane.#UfaaveriAmaanRaaje pic.twitter.com/fNnYGgl2Hc
— Hassan Shiyan (@HassanShiyaan) August 25, 2023
ޝިޔާންއަކީ އެމްޑީޕީ ދޫކުރައްވައި ދަ ޑިމޮކްރެޓްސް އަށް ސޮއިކުރެއްވި 12 މެމްބަރުންގެ ތެރެއިން އެއް މެމްބަރެކެވެ. އޭނާ ވެފައި ވަނީ ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އެންމެ އަރިސް މެމްބަރުންގެ ތެރޭގައެވެ. މި ފަހަކާ ޖެހެންދެން ވެސް ޝިޔާން ހުންނެވީ ނަޝީދާއެކުގައެވެ. އެކަމަކު، ދަ ޑިމޮކްރެޓްސްގެ ހަރަކާތްތަކުން ޝިޔާން ނުފެންނަތާ ދުވަސްތަކެއް ވަނީ ވެފައެވެ.
ޝިޔާން އެމްޑީޕީ އަށް ސޮއިކުރެއްވި އިރު، ދަ ޑިމޮކްރެޓްސްއާ އެކުގައި މަސައްކަތް ކުރެއްވި ރައްޔިތުންގެ މަޖިލިހުގެ ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފް އާއި ކުޅުދުއްފުށީގެ މޭޔަރު މުހައްމަދު އާތިފާއި އެހެން ހުރިހާ މެމްބަރުން ވަނީ ދަ ޑިމޮކްރެޓްސް ދޫކުރައްވައި އެމްޑީޕީއާ ގުޅިވަޑައިގެންފައެވެ.
ކޮމެންޓު ފޮނުވާ