ރާއްޖޭގެ ރައްޔިތުންނަށް ދެއްވާފައިވާ ޚިދުމަތާއި، ކޮށްދެއްވާފައިވާ މަސައްކަތަށް ބަލާއިރު މިފަހަރުގެ ރިޔާސީ ރޭހުގައި އޭނާއާއި ގާތްކުރެވޭ ވަރުގެ ކެންޑިޑެޓަކުވެސް މިއިންތިޚާބުގައި ވާދަ ނުކުރާކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިންރާހިމް ވިދާޅުވެއްޖެއެވެ.

ރިޔާސީ ކެމްޕޭންގައި ނ.މަނަދޫއަށް މިރޭ ޤާސިމާއި، ކެމްޕޭން ޓީމުން ވަޑައިގެންނެވުމުން އެރަށުން ވަނީ ހޫނު މަރުހަބާއެއް ކިޔާފައެވެ. މިރޭ މަނަދޫ ރައްޔިތުންނާއި މުޚާތަބްކޮށް ވާހަކަ ދައްކަވަމުން ޤާސިމް ވިދާޅުވީ ރިޔާސީ އިންތިޚާބަކީ ޤައުމުގެ ވެރިކަން ފަސް އަހަރު ދުވަހަށް މީހަކާއި ހަވާލު ކުރުމަށް ބޭއްވޭ އިންތިޚާބު ކަމަށެވެ.

މިއިންތިޚާބުގައި ރައްޔިތުން ވަކި ޕާޓީއަކަށް، ވަކި މީހެއްގެ މޫނަށް ބަލައިގެން ވޯޓު ދިނުމަކީ އޭގެ ނަތީޖާ ހިތިވެދާނެ ކަމެއްކަމަށް މާޒީން ތަޖުރިބާ ކޮށްފައިވާކަމަށް ޤާސިމް ވިދާޅުވިއެވެ. އޭނާ ވިދާޅުވީ ރައްޔިތުން ވޯޓު ދެއްވާއިރު މީހާ ކޮށްފައިވާ މަސައްކަތާއި، އަދާކޮށްފައިވާ ވަޒީފާތަކާއި، ދެއްވާފައިވާ ޚިދުމަތްތަކަށް ބެލުމަކީ ވަރަށް ބޮޑަށް އެދޭކަމެއްކަމަށެވެ. މިކަންކަމަށް ބަލައިގެން ރައްޔިތުން ވޯޓުލާނަމަ އެމީހަކީ އޭނާއަށް ވާނެ ކަމާއިމެދު ޝައްކު ނުކުރައްވާކަމަށް ޤާސިމް ވިދާޅުވިއެވެ.

މިފަހަރު މިއިންތިޚާބުގައި ވާދަކުރާ 8 ކެންޑިޑޭޓުންނަށް ބަލާއިރު ކުރި މަސައްކަތާއި ދިން ޚިދުމަތަށް ބަލާއިރު އަޅުގަނޑާއި ގާތް ކުރެވޭ ވަރުގެ ކެންޑިޑޭޓަކުވެސް ނުހުންނާނެ. ތިބޭފުޅުން ނިކަން ރަނގަޅަށް ބައްލަވާ. ނުހުންނާނެ އިނގޭތޯ.

– ޤާސިމް ވިދާޅުވިއެވެ.

ޤާސިމް ވިދާޅުވީ ކުޑަޕާޓީ ބޮޑު ޕާޓީ ބަލައިގެން ވޯޓު ދެއްވިޔަސް އެއީ މާ މަންފާކުރަނިވި ކަމެއް ނޫންކަން ތަޖުރިބާ ކުރެވިފައިވާކަމަށެވެ. އެހެންކަމުން މިފަހަރުގެ އިންތިޚާބުގައި މިހާރު ހުރި ރައީސާއި މާޒީގާއި ތަޖުރިބާ ކުރި ޕާޓީތަކާއި ބޭފުޅުންނަށް ނުބައްލަވައި ޚިދުމަތާއި މަސައްކަތަށް ބަލައި ވޯޓު ދެއްވުމަށް ޤާސިމް ވަނީ އެދިވަޑައިގެންފައެވެ.