ރައީސް އިބްރާހިމް މުހައްމަދު ސާލިހުގެ ސަރުކާރަކީ ގިނަ އަދަދެއްގެ ރައްޔިތުންގެ އުންމީދުތަކާއި ގުޅިފައިވާ ސަރުކާރެއްކަމަށް މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.
މިއަދު ކުރިއަށްދިޔަ މަޖިލީހުގެ 3 ވަނަ ދައުރުގެ 2 ވަނަ ޖަލްސާގައި ވާހަކަދައްކަވަމުން ޝިފާއު ވިދާޅުވީ، ރައްޔިތުންގެ އުންމީދުތައް ހަގީގަތަކަށް ހަދައިދިނުމުގައި މަޖިލީހުގައ ތިއްބަވާ ގިނަ އަދަދެއްގެ އެމްޑީޕީއަށް ނިސްބަތްވާ މެމްބަރުންގެ ބުރަ މަސައްކަތްތައް ހިމެނޭކަމަށެވެ.
މި ސަރުކާރުންދަނީ މެމްބަރުންގެވެސް ބުރަ މަސައްކަތްތަކާއިއެކު ބާރު ދުވެއްޔެއްގައި ރައްޔިތުންގެ އުންމީދުތައް ހަގީގަތަށް ހަދައިދެމުންކަމަށް ވިދާޅުވިއެވެ. ރައްޔިތުންގެ މަޖިލިސް ހުއްޓުވާލާފައި އޮތްނަމަވެސް، ރައީސް ޞާލިހުގެ ހިތްވަރު ބަލި ނުކުރެވޭނެކަމަށާއި މަޖިލީހުގައި ބޮޑު ތަޅު އަޅުވާފައި ހުރިނަމަވެސް ރައީސް ޞާލިހު ވަރުބަލިވެސް ނުކުރެވޭނެކަމަށް ވިދާޅިވިއެވެވެ. ޝިފާއު ވިދާޅުވީ، ކޮންމެ ފަދަ ދަތިތަކެއް ކުރިމަތިކުރުވި ނަމަވެސް ސަރުކާރުންދާނީ ރައްޔިތުން ބޭނުންވާ ކަންކަން ބާރު ދުވެއްޔެއްގައި ފުރިހަމަކުރަމުންކަމަށެވެ.
މީގެ އިތުރުން ސާފު ބޯފެނަކީ ވެރިކަން ކުރާ ރަށާއި އާބާދީ ބޮޑު މަދު ރަށްތަކަށް ހައްގު އެއްޗެއްކަމަށް ގަބޫލުކޮށްގެން ވެރިކަން ކުރެވެމުންދާތާ އެތައް ސަތޭކަ އަހަރެއް ވެފައިވާކަމަށް ޝިފާޢު ވިދާޅުވިއެވެ. އެހެންނަމަވެސް ރައީސް ޞާލިހު އެންމެ ފުރަތަމަ ކުރެއްވި މަސައްކަތްތަކަކީ ގައިން ތާހިރުވުމަށާއި ބުއިމުގެ ބޭނުމަށް އެންމެހާ ރަށްތަކަށް ސާފު ބޯފެން ފޯރުކޮށްދިނުންކަަމަށް ޝިފާއު ފާހަގަކުރެއްވިއެވެ. ރާއްޖޭގެ ހުރިހާ ރަށެއްގައިވެސް ފެނާއި ނަރުދަމާގެ މަސައްކަތްތައް ކުރެވެމުންދާކަމުގައި ވިދާޅުވިއެވެ.
