ބ. މާޅޮހުގައި ޓޫރިޒަމް ފުޅާކޮށް އިގްތިސާދީ ހަރަކާތް އިތުރު ކުރުމަށް އެ ރަށުގައި ސިޓީ ހޮޓަލެއް އެޅުމަށް ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފިއެވެ.
ރިޔާސީ އިންތިހާބުގެ ކެމްޕެއިނަށް މާޅޮހަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ރައީސް ވަނީ ބ. އަތޮޅު ބަޔޯސްފިސްއާ ރިޒާވެއް އޮތް އިރު، މާޅޮހަކީ އެ ސަރަހައްދުގައި އޮންނަ ރަށެއް ކަން ފާހަގަ ކުރައްވައިފައެވެ. އެހެންވީމަ ޓޫރިޒަމްގެ ހަރަކާތްތަކަށް މާޅޮހަކީ ވަރަށް އެކަށީގެންވާ ރަށެއް ކަމަށް ވިދާޅުވިއެވެ.
ރައީސް ވިދާޅުވި ގޮތުގައި ހަނިފަރުބޭގައި ޑައިވްކޮށް، އެ ތަން ބަލާލުމަށް މާޅޮހަށް ވެސް ގިނަ އަދަދެއްގެ ފަތުރުވެރިން އާދެއެވެ. އެގޮތަށް އަންނަ ފަތުރުވެރިންނަށް ހިދުމަތްދޭނެ ތަނެއް ހުންނަން ޖެހޭ ކަމަށް ވެސް ރައީސް ވިދާޅުވިއެވެ.
"މިސަރަހައްދުގައި ޓޫރިޒަމް ފުޅާކޮށް އިގްތިސާދީ ހަރަކާތް އިތުރުކުރުމަށް މިރަށުގައި އަޅުގަނޑުމެން ސިޓީ ހޮޓަލެއް އަޅައިދޭނަން." ރައީސް ވިދާޅުވިއެވެ.
ހަނިފަރު ބޭ އަކީ 10 އަހަރަށް ހިމާޔަތްކޮށްފައިވާ ތަނެކެވެ. ނަމަވެސް އިތުރު 10 އަހަރަށް އެތަނުގެ ހިމާޔަތް ދަންމާލަން ނިންމާފައިވާ ކަމަށް ވެސް ރައީސް ވިދާޅުވިއެވެ.
ރައީސް ފާހަގަކުރެއްވި ގޮތުގައި ބަޔޯސްފިއާ ރިޒާވުން ލިބޭ އާމްދަނީގެ ބައެއް މާޅޮހާއި ބ. އަތޮޅަށް ހަމަޖެއްސުމަކީ މުހިއްމު ކަމެކެވެ. އަދި ބަޔޮސްފިއާ ރިޒާވްގެ ތެރެއަށް ވަންނަ މި ރަށުގެ އިހުތިސާސްގައި ހިމެނޭ ތަންތަން ބެލެހެއްޓުން ރަށު ކައުންސިލާ ހަވާލުކުރަން ނިންމާފައިވާ ކަމަށާއި އެ ތަނަށް ވަންނަ އާމްދަނީން އެ ކައުންސިލަށް ލިބޭ ގޮތަށް ބަދަލު ގެންނާނެ ކަމަށް ވެސް ވިދާޅުވިއެވެ.
