2 ރަށެއްގެ ބިން ހިއްކުމާއި، 2 ރަށެއްގެ ބަނދަރުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީއާއި ޙަވާލުކޮށްފިއެވެ.
މިނިސްޓްރީ އޮފް ނޭޝެނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ފަރާތުން އެމް.ޓީ.ސީ.ސީއާއި ޙަވާލުކުރި މަޝްރޫޢުތަކުގެ ތެރޭގައި ށ. ފުނަދޫ ބިން ހިއްކުމާއި، ތ. ކިނބިދޫ ބިން ހިއްކުމާއި، ބ. ތުޅާދޫ އެއްގަމު ތޮއްޓާއި ބޭރުތޮށި އަޕްގްރޭޑްކުރުމުގެ އިތުރުން މ. ރަތްމަންދޫ ބަނދަރު ތަރައްޤީކޮށް ގޮނޑޮދޮށް ޚިމާޔަތްކުރުން ހިމެނެއެވެ.
މި މަޝްރޫޢުތަކުގެ ތެރެއިން ށ. ފުނަދޫ ބިން ހިއްކުމުގެ މަސައްކަތް އެމް.ޓީ.ސީ.ސީއާއި ޙަވާލުކޮށްފައިވަނީ 360 ދުވަހުން މަސައްކަތް ނިންމާގޮތަށް، 139 މިލިއަނަށްވުރެ ގިނަ ރުފިޔާއަށެވެ. މި މަޝްރޫޢުގެ ދަށުން ފުނަދޫއިން 25 ހެކްޓަރުގެ ބިން ހިއްކާނެއެވެ.
ތ. ކިނބިދޫ ބިން ހިއްކުމުގެ މަޝްރޫޢު އެމް.ޓީ.ސީ.ސީއާއި ޙަވާލުކޮށްފައިވަނީ 340 ދުވަހުން މަސައްކަތް ނިންމާގޮތަށެވެ. މިއީ 148 މިލިއަނަށްވުރެ ގިނަ ރުފިޔާ ޚަރަދުކޮށްގެން ހިންގާ މަޝްރޫޢެކެވެ. ކިނބިދޫއިންވެސް ހިއްކުމަށް ހަމަޖެހިފައިވަނީ 25 ހެކްޓަރުގެ ބިމެވެ. އެއީ ރަށުގެ އިރުމަތީ ފަރާތަށެވެ.
އެމް.ޓީ.ސީ.ސީއާއި ބ. ތުޅާދޫ އެއްގަމުތޮށި އަދި ބޭރުތޮށި އަޕްގްރޭޑްކުރުމުގެ މަސައްކަތް ޙަވާލުކުރީ 270 ދުވަހުގެ ތެރޭގައި ނިންމާގޮތަށެވެ. މި މަޝްރޫޢަށް 22 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވިދާޅުވެއެވެ.
ބ.ތުޅާދޫ އެއްގަމުތޮށި އަދި ބޭރުތޮށި އަޕްގްރޭޑް ކުރުމުގެ މަޝްރޫޢުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އާ ހަވާލުކޮށްފިއެވެ.
22،800،727.69 ރުފިޔާއަށް މި މަސައްކަތް ހަވާލުކޮށްފައިވަނީ 270 ދުވަހުގެ ތެރޭގައި ނިންމުމަށެވެ. pic.twitter.com/MbUX3IInEv
— Min.of National Planning, Housing & Infrastructure (@MoNPHImv) August 21, 2023
މި މަޝްރޫޢުގެ ދަށުން 551.91 މީޓަރުގެ އެއްގަމުތޮށި މަރާމާތުކޮށް، 551.91 މީޓަރުގެ ސްކަވަރ އޭޕްރޮންއެއް ލާނެއެވެ. އަދި 1 ރޭމްޕު ހެދުމާއި، 11 މޫރިން ބޮއި ހަރުކޮށް، 468 މީޓަރުގެ ބޭރުތޮއްޓެއް ޖަހާނެއެވެ. މީގެއިތުރުން 15 މީޓަރުގެ ސަބްމާޖް ބްރޭކްވޯޓަރއެއް ޖެހުމާއި 1 ޖެޓީ ހެދުމާއި 1 އެކްސެސް ޕްލޭޓްފޯމެއް ހެދުންވެސް މި މަޝްރޫޢުގެ ތެރޭގައި ހިމެނެއެވެ.
ޕްލޭނިންގ މިނިސްޓްރީގެ ފަރާތުން މ. ރަތްމަންދޫ ބަނދަރުގެ މަސައްކަތް އެމް.ޓީ.ސީ.ސީއާއި ޙަވާލުކޮށްފައިވަނީ 480 ދުވަހުގެ ތެރޭގައި މަސައްކަތް ފުރިހަމަކުރާގޮތަށެވެ. މި މަޝްރޫޢަށް 68 މިލިއަނަށްވުރެ ގިނަ ރުފިޔާ ޚަރަދުވާނެއެވެ.
MTCC has signed an agreement with Ministry of National Planning, Housing and Infrastructure – Maldives towards implementation of M. Raiymandhoo Harbor Development Project. COO Shahid Hussain Moosa signed on behalf of MTCC and Ms. Fathimath Shaana Farooq, DG, signed on behalf of… pic.twitter.com/KD2NtDk9n6
— MTCC Plc (@MTCCPlc) August 21, 2023
ރަތްމަންދޫ ބަނދަރު ހެދުމުގެ މަޝްރޫޢުގެ ދަށުން ބަނދަރު ފުންކުރުމާއި ނެރު ފުންކުރުމުގެ އިތުރުން 254 މީޓަރުގެ އެއްގަމު ތޮއްޓެއް ޖެހުމާއި، 26 މީޓަރުގެ ރިވެޓްމަންޓް ޖެހުން ހިމެނެއެވެ. އަދި 20 މީޓަރުގެ ގްރޮއިން ޖެހުމާއި، 192 މީޓަރުގެ ސޭންޑް-ފިލް ބްރޭކްވޯޓަރ ޖެހުމާއި، 85 މީޓަރުގެ ޗެނަލް ބްރޭކްވޯޓަރ ޖަހާ، 15 މީޓަރުގެ ސަމްބާޖް ބްރޭކްވޯޓަރ ޖެހުންވެސް ހިމެނެއެވެ.
މީގެ އިތުރުން ބްރިޖަކާއި ރޭމްޕެއް ހެދުމާއި، މޫރިން ބޮއި ހަރުކުރުމާއި، މަގުބައްތި ޖެހުމާއި، އެއްގަމުތޮށީގެ ވަށައިގެން ޕޭވްމަންޓް ހެދުމާއި، ފެން ހިންދުމަށް ކާނުތައް ބެހެއްޓުމުގެ އިތުރުން ނެރު ބައްތި ހަރުކުުރުމުގެ މަސައްކަތްވެސް މި މަޝްރޫޢުގެ ދަށުން ކުރާނެއެވެ.
ޕްލޭނިންގ މިނިސްޓްރީގައި ވަކިވަކި ބޭއްވި ރަސްމިއްޔާތެއްގައި މި 4 މަޝްރޫޢުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ޝާނާ ފާރޫޤެވެ. އަދި އެމް.ޓީ.ސީ.ސީގެ ފަރާތުން ސޮއިކުރެއްވީ އެކުންފުނީގެ ޗީފް އޮޕަރޭޓިންގ އޮފިސަރ ޝާހިދު ޙުސައިން މޫސާއެވެ.
