ބ. ތުޅާދޫ އެއަރޕޯޓް އެޅުމަށްޓަކައި އެރަށު ބިން ހިއްކުމުގެ މަސައްކަތް އަންނަ ހަފްތާގައި ފަށްޓަވާނެކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހް ވިދާޅުވެއްޖެއެވެ.
ރިޔާސީ ކެމްޕޭންގައި ތުޅާދޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ ރާއްޖޭގެ އެކި ސަރަޙައްދުތަކުގައި ތަރައްޤީގެ އެކި މަޝްރޫޢުތައް ކުރިއަށްގެންދާކަމަށާއި ތުޅާދޫއަށް ބޭނުންވާ މަޝްރޫޢުތައްވެސް ކުރިއަށްގެންދާކަމަށެވެ. އެގޮތުން މިހާރުވެސް އެރަށަށް މުހިންމު މަސައްކަތްތައް ނިންމާފައިވާކަމަށެވެ. ރައީސް ވިދާޅުވީ ތުޅާދޫގައި ތަރައްޤީކުރި 100 ހައުސިން ޔުނިޓްގެ މަސައްކަތް ނިންމާ ދެވަނަ ދައުރުގައި އިތުރު 100 ހައުސިން ޔުނިޓް އެޅުމަށް ނިންމާފައިވާކަމަށެވެ. އަދި ސިއްޙީ ޚިދުމަތް ތުޅާދޫގައި ފުޅާކުރުމަށްޓަކައި އަޅާ ހޮސްޕިޓަލްގެ މަސައްކަތްވެސް ބާރު ދުވެލީގައި ކުރަމުން އަންނަކަމަށް ރައީސް ވިދާޅުވިއެވެ.
ތުޅާދޫއަށް ދެން ބޭނުންވާ އެންމެ މުހިންމު ކަމަކީ އެއަރޕޯޓްކަން ފާހަގަކުރައްވާ ރައީސް ވިދާޅުވީ އެއަރޕޯޓްގެ މަސައްކަތް ފެށުމަށްޓަކައި ބިން ހިއްކުމުގެ އަމަލީ މަސައްކަތް އަންނަ ހަފްތާގައި ފަށްޓަވާނެކަމަށެވެ.
މިރަށުގައިވެސް ތަރައްޤީގެ ގިނަ މަޝްރޫއުތަކެއްވެސް ކުރިއަށް އެބަގެންދޭ. އެއަރޕޯޓްގެ މަސައްކަތް ފެށުމަށްޓަކައި ބިން ހިއްކުމުގެ މަސައްކަތް އަންނަ ހަފްތާ ނިމުމުގެ ކުރިން ފަށާނެ. އެއީ 44 ހެކްޓަރުގެ ބިން.
– ރައީސް ޞާލިހް ވިދާޅުވިއެވެ.
ތުޅާދޫގެ ބިން ހިއްކުމުގެ މަސައްކަތް ކުރުމަށް ހަވާލުކޮށްފައިވަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން ޕްރައިވެޓް ލިމިޓެޑް ކިޔާ ކުންފުންޏަކާއެވެ. ރާއްޖޭގެ މީހުން ދިރިއުޅޭ ކޮންމެ ރަށަކުން ފުރައިގެން 20 އަކަށް މިނެޓުން ދެވޭހާ ކައިރީގައި އެއަރޕޯޓެއް ތަރަޢްޤީކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގެ މުހިންމު ސިޔާސަތެވެ.
