އެމްޑީޕީން މިއަދު ވަކި، ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު ސިރާޖު އިދިކޮޅު ކެނޑިޑޭޓު ޑރ. މުއިއްޒުއަށް ތާއީދު ކުރަން ނިންމަވައިފިއެވެ.
އެމްޑީޕީން ވަކިވިކަން އިއުލާން ކުރިތާ ގަޑިއިރުތަކަކަށް ފަހު، މުއިއްޒުއާއެކު ނަގާފައިވާ ފޮޓޯއަކާއެކު މިރޭ ކުރި ޓުވީޓެއްގައި ސިރާޖު ވިދާޅުވީ ރިޔާސީރޭހުގައި ޑރ. މުއިއްޒު އަށް ތާއީދުކުރަން އޭނާ ނިންމާފައިވާ ކަމުގައެވެ. އަދި އޭނާ ވިދާޅުވީ 2018 ވަނަ އަހަރު ރިޔާސީ އިންތިހާބުގައި ލާމު އަތޮޅުން އެމްޑީޕީ ކެނޑިޑޭޓް ކުރި ހޯދިކަމުގައިވިޔަސް މިއިންތިހާބުގައި އެކަން ބަދަލުކުރާނެ ކަމުގައެވެ.
ރިޔާސީރޭހުގައި ޑރ. މުއިއްޒު @MMuizzu އަށް ތާއީދުކުރަން އަޅުގަނޑު ނިންމައިފިން.
2018 ވަނަ އަހަރު ރިޔާސީ އިންތިހާބުގައި ލާމު އަތޮޅުން އެމްޑީޕީ ކެނޑިޑޭޓް ކުރި ހޯދިކަމުގައިވިޔަސް މިއިންތިހާބުގައި އަޅުގަނޑުމެން އެކަން ބަދަލުކުރާނަން. #IbuNoonGotheh#Muizzu2023 #DrMuizzuSembe2023 pic.twitter.com/1FNs9aVrB4
— Moosa Siraj (@MoosesSiraj) August 21, 2023
އެމްޑީޕީން ވަކިވިކަން އިއުލާން ކުރައްވަމުން، އެމްޑީޕީގެ ޗެއާޕާސަން ފައްޔާޒު އިސްމާއިލަށް އެޑްރެސްކޮށް ސިރާޖު ފޮނުވި ސިޓީގައި ވިދާޅުވީ އެމްޑީޕީގެ މެމްބަރެެއްގެ ގޮތުގައި އިތުރަށް ހުންނަން ބޭނުން ނުވާތީ، އެމްޑީޕީގެ މެމްބަރުކަމުން ވަކިކޮށް، ޕާޓީގެ ދަފްތަރުން މިއަދު ފެށިގެން އުނިކޮށް ދެއްވުމަށް އެދިވަޑައިގެންފައެވެ.
އެމްޑީޕީގެ ތެރޭގައި އުފެދުނު ޚިޔާލް ތަފާވުމަށްފަހު އެމްޑީޕީގެ އެކި ކަންކަމުގައި ވަރަށް މަދުން ނޫނީ ނުފެންނަ ސިރާޖު އެމްޑީޕީން ވަކިވި ސަބަބުގެ ތަފްސީލަށް މާބޮޑަށް ގޮސްފައި ނުވެއެވެ. ސިރާޖަކީ މިސަރުކާރު ވެރިކަމަށް ގެނައުމަށް އެންމެ ބުރަ މަސައްކަތް ކުރި މެމްބަރުންގެ ތެރޭގައި ހިމެނޭ މެމްބަރެކެވެ. އެގޮތުން އޭރުގެ ސަރުކާރުން ހައްޔަރު ކުރާ މީހުންގެ ޤާނޫނީ ވަކީލުކަން ހިލޭ ކޮށްދެއްވުމާއި، ގެއްލިފައިވާ މީހުންނާއި މަރާލެވިފައިވާ މީހުންނަށް އިންސާފު ހޯދުމަށް ސިރާޖު ވަރަށް ގިނަ މަސައްކަތްތަކެއް ކުރެއްވިއެވެ.
ސިރާޖު މިއަދު އިދިކޮޅު ކެނޑިޑޭޓަށް ތާއީދު ކުރައްވަން ނިންމަވާފައިވާއިރު، އޭނާއަކީ މަޖިލީހުގައި އެމްޑީޕީގެ މެމްބަރުން މަޖިލީހުގެ ރައީސް މުހައްމަދު ނަޝީދާއި، މަޖިލީހުގެ ނައިބް ރައީސް އީވާގެ އިތުބާރު ނެތްކަމުގެ މައްސަލާގައިވެސް ސޮއި ނުކުރާ މެމްބަރުންގެ ތެރޭގައި ހިމެނޭ މެމްބަރެކެވެ. އަދި މިމައްސަލަތަކުގައިވެސް ސިރާޖު ފެނިފައި ނުވެއެވެ.
ސިރާޖަކީ މިސަރުކާރުގެ ބޯހިޔާ ވަހިކަމުގެ ސިޔާސަތުގެ ތެރެއިން ހުޅުމާލެއިން ހިލޭ ގޯތި ދޭތީ އެކަމާއި އެންމެ ބޮޑަށް ދެކޮޅު ހައްދަވާ މެމްބަރެވެ. ސިރާޖުވަނީ ތަކުރާރުކޮށް މިއީ ޤާނޫނާއި ޚިލާފް ކަމެއްކަމަށް ވިދާޅުވެފައެވެ. މަޖިލީހުގެ 65 މެމްބަރުންނާއިއެކު ސުޕަ މެޖޯރިޓީއެއް އޮތް އެމްޑީޕީން 15 މެމްބަރަކު މިހާތަނަށް ވަނީ އެޕާޓީން ވަކިވެފައެވެ.
