ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު އެމްޑީޕީން ވަކިވެއްޖެއެވެ.
އެމްޑީޕީގެ ޗެއާޕާސަން ފައްޔާޒު އިސްމާއިލަށް އެޑްރެސްކޮށް ސިރާޖު ފޮނުވި ސިޓީގައި ވިދާޅުވީ އެމްޑީޕީގެ މެމްބަރެެއްގެ ގޮތުގައި އިތުރަށް ހުންނަން ބޭނުން ނުވާތީ، އެމްޑީޕީގެ މެމްބަރުކަމުން ވަކިކޮށް، ޕާޓީގެ ދަފްތަރުން މިއަދު ފެށިގެން އުނިކޮށް ދެއްވުމަށް އެދިވަޑައިގެންފައެވެ.
އެމްޑީޕީގެ ތެރޭގައި އުފެދުނު ޚިޔާލް ތަފާވުމަށްފަހު އެމްޑީޕީގެ އެކި ކަންކަމުގައި ވަރަށް މަދުން ނޫނީ ނުފެންނަ ސިރާޖު އެމްޑީޕީން ވަކިވި ސަބަބުގެ ތަފްސީލަށް މާބޮޑަށް ގޮސްފައި ނުވެއެވެ. ސިރާޖަކީ މިސަރުކާރު ވެރިކަމަށް ގެނައުމަށް އެންމެ ބުރަ މަސައްކަތް ކުރި މެމްބަރުންގެ ތެރޭގައި ހިމެނޭ މެމްބަރެކެވެ. އެގޮތުން އޭރުގެ ސަރުކާރުން ހައްޔަރު ކުރާ މީހުންގެ ޤާނޫނީ ވަކީލްކަން ހިލޭ ކޮށްދެއްވުމާއި، ގެއްލިފައިވާ މީހުންނާއި މަރާލެވިފައިވާ މީހުންނަށް އިންސާފު ހޯދުމަށް ސިރާޖު ވަރަށް ގިނަ މަސައްކަތްތަކެއް ކުރެއްވިއެވެ.
ސިރާޖު އިސްތިއުފާ ދެއްވާފައިވާއިރު އޭނާއަކީ މަޖިލީހުގައި އެމްޑީޕީގެ މެމްބަރުން މަޖިލީހުގެ ރައީސް މުހައްމަދު ނަޝީދާއި، މަޖިލީހުގެ ނައިބް ރައީސް އީވާގެ އިތުބާރު ނެތްކަމުގެ މައްސަލާގައިވެސް ސޮއި ނުކުރާ މެމްބަރުންގެ ތެރޭގައި ހިމެނޭ މެމްބަރެކެވެ. އަދި މިމައްސަލަތަކުގައިވެސް ސިރާޖު ފެނިފައި ނުވެއެވެ.
ދިވެހި ރައްޔިތުންގެ ޑިމޮކްރަޓިކް ޕާޓީގެ މެންބަރެއްގެ ގޮތުގައި އިތުރަށް ހުންނަން ބޭނުން ނުވާތީ، މިއަދުންފެށިގެން އަޅުގަނޑު އެމްޑީޕީން ވަކިވެއްޖައިން. pic.twitter.com/JN00CszdeK
— Moosa Siraj (@MoosesSiraj) August 21, 2023
ސިރާޖަކީ މިސަރުކާރުގެ ބޯހިޔާ ވަހިކަމުގެ ސިޔާސަތުގެ ތެރެއިން ހުޅުމާލެއިން ހިލޭ ގޯތި ދޭތީ އެކަމާއި އެންމެ ބޮޑަށް ދެކޮޅު ހައްދަވާ މެމްބަރެވެ. ސިރާޖުވަނީ ތަކުރާރުކޮށް މިއީ ޤާނޫނާއި ޚިލާފް ކަމެއްކަމަށް ވިދާޅުވެފައެވެ. މަޖިލީހުގެ 65 މެމްބަރުންނާއިއެކު ސުޕަ މެޖޯރިޓީއެއް އޮތް އެމްޑީޕީން 15 މެމްބަރަކު މިހާތަނަށް ވަނީ އެޕާޓީން ވަކިވެފައެވެ.
